Па ўсёй Расеі з продажу знікае інсулін

Няма ні ў адной аптэцы.

Хворыя на цукровы дыябет у Расеі сутыкаюцца з праблемамі ў набыцці інсуліну, рынак якога традыцыйна забяспечвалі замежныя вытворцы.

Скаргі на адсутнасць у продажы інсуліну, у першую чаргу «кароткага», уколы якога выкарыстоўваюцца, каб знізіць узровень цукру пасля ежы, паступаюць з усёй Расеі – ад Масквы да Далёкага Усходу.

«Раней на паліцах ляжала шмат лекаў, а цяпер яны амаль пустыя», – расказала The Moscow Times жыхарка сталіцы, якая пакутуе на цукровы дыябет. Паводле ейных словаў, набыццё інсуліну, якое раней не было цяжкім, ператвараецца ў паездкі з аптэкі ў аптэку, некаторыя з іх дазваляюць «браняваць» прэпарат толькі на 30 хвілінаў. Пры гэтым лекары скарачаюць тэрміны рэцэптаў, спасылаючыся на нястачу прэпарату, жаліцца масквічка: «Звычайна мне яго выпісвалі на 3 месяцы адразу. А тут даюць рэцэпт на адзін месяц».

Праблемы ў дыябетыкаў, якіх, паводле звестак Міністэрства аховы здароўя, у Расеі больш за 10 мільёнаў, сталі ўзнікаць яшчэ летась. Паводле звестак RNC Pharma, за студзень – верасень 2023 аптэкі прадалі мінімальную за 5 гадоў колькасць інсуліну – 11,8 млн пачкаў, а ў параўнанні з 2022-м годам аб'ёмы рэалізацыі ўпалі на 8%.

На адсутнасць інсуліну масава скардзяцца жыхары Алтайскага краю. «Я прыходжу [у аптэку], мне кажуць, што інсуліну няма», – сказала NGS22.ru Алена з Барнаула (яна папрасіла не называць сваё прозвішча). Паводле ейных словаў, у краявым Міністэрстве аховы здароўя пасля звароту ёй паведамілі, што інсуліну няма, але дапамагла скарга ў федэральнае Міністэрства аховы здароўя: праз некалькі тыдняў прэпарат з'явіўся ў аптэцы. На адсутнасць інсуліну скардзяцца жыхары Чэлябінскай вобласці, Забайкальскага краю і Ленінградскай вобласці.

Паводле словаў Ганны Вавілінай, жыхаркі Чыты, у якой на дыябет хварэюць дзеці, «кароткага» інсуліну «няма ні ў адной аптэцы». «Іх немагчыма замовіць. Іх проста няма, – расказвае Вавіліна. – Яны вытворчасці Даніі і, уласна, таму нам гаварылі, што ў сувязі з сітуацыяй у краіне іх вельмі цяжка дастаць».

Амаль дзве траціны інсуліну ў Расеі імпартуецца: французская Sanofi забяспечвае 35% рынку, а дацкая Novo Nordisk – яшчэ 33%. Але імпартныя лекі знікаюць з аптэк: у 2023 годзе асартымент скараціўся на 1,3 тысячы пазіцый, падлічылі ў DSM Group. Але на фоне вайны і санкцый кошт вядзення бізнэсу ў Расеі для замежных кампаній значна вырас у першую чаргу праз падаражанне лагістыкі, казаў раней дырэктар у развіцці RNC Pharma Мікалай Бяспалаў.