Пажар на борце: Як экіпаж бездакорна эвакуяваў пасажыраў з самалёта, ахопленага полымем

Эвакуацыя самалёта Japan Airlines у аэрапорце Токіа прыемна здзівіла свет.

Бездакорная эвакуацыя самалёта Japan Airlines у аэрапорце Токіа прыемна здзівіла свет. Эксперты ў галіне авіяцыі і чальцы экіпажу расказалі ВВС, што поспех эвакуацыі забяспечыла выдатная падрыхтоўка экіпажу і ўзорныя паводзіны пасажыраў.

Прытрымліваючыся ўказанняў экіпажу, пасажыры кінуліся да аварыйных выхадаў самалёта авіякампаніі Japan Airlines без ручной паклажы.

Паводле словаў авіяцыйных экспертаў, менавіта выкананне гэтага правіла стала асноўным чыннікам, які дазволіў без стратаў эвакуяваць усіх 379 чалавек, якія знаходзіліся на борце самалёта Airbus A350, што загарэўся на ўзлётна-пасадачнай паласе аэрапорта «Ханэда» ў Токіа.

Рэйс 516 авіякампаніі Japan Airlines загарэўся пасля сутыкнення з самалётам берагавой аховы пры заходзе на пасадку. Пяць з шасці чалавек, якія знаходзіліся на борце невялікага самалёта, загінулі.

«Ні ў адным у відэа, якое я бачыў, ні ў аднаго пасажыра ў руках няма паклажы. Калі б пасажыры спрабавалі захапіць з сабой ручную паклажу, гэта было б вельмі небяспечна, паколькі гэта запавольвае эвакуацыю», – сказаў прафесар Эд Галеа, дырэктар Групы пажарнай бяспекі ва Універсітэце Грынвіча.

Паводле ягоных словаў, умовы эвакуацыі былі няпростымі.

«Гэтая аварыя была далёкая ад ідэальнай. Самалёт спыніўся з нахілам на нос, таму пасажырам было цяжка перасоўвацца», – сказаў ён.

Для эвакуацыі пасажыраў можна было выкарыстоўваць толькі тры надзіманыя трапы, але праз становішча самалёта разгарнуць іх належным чынам не атрымалася. У выніку трапы былі звешаныя пад вялікім кутом, што ўскладніла эвакуацыю.

Як паведамілі прадстаўнікі Japan Airlines, сістэма абвесткі самалёта таксама не спрацавала падчас эвакуацыі, таму экіпажу давялося інструктаваць пасажыраў з дапамогай мегафона і проста гучнымі крыкамі.

Адзін пасажыр атрымаў удары, яшчэ 13 звярнуліся да медыкаў праз фізічны дыскамфорт, паведамілі ў авіякампаніі.

Самалёт Japan Airlines вылецеў з аэрапорта «Цітосэ» ў Сапара на востраве Хакайда а 16-й паводле мясцовага часу (07:00 GMT) і прызямліўся ў «Ханэдзе» незадоўга да 18-й. Невялікі самалёт берагавой аховы павінен быў даставіць дапамогу пацярпелым ад магутнага землятрусу, які адбыўся напярэдадні. Цяпер вядзецца расследаванне сутыкнення.

Падрыхтоўка экіпажу

Былая бортправадніца Japan Airlines, якая папрасіла не называць яе імя, расказала ВПС, што пасажырам 516 рэйсу «неверагодна пашанцавала».

«Я адчула палёгку, даведаўшыся, што ўсе пасажыры ў бяспецы. Але калі я пачала думаць пра працэдуру экстраннай эвакуацыі, мяне ахапілі нервовасць і страх, – сказала яна. – У залежнасці ад таго, як сутыкнуліся два самалёты і як распаўсюдзіўся агонь, усё магло быць значна горш».

У падобных сітуацыях бывае цяжка прадухіліць распаўсюджванне панікі сярод пасажыраў, расказала былая сцюардэса.

«Але тое, чаго яны дамагліся, складаней, чым здаецца. Тое, што яны здолелі выратаваць усіх, – вынік добрай каардынацыі дзеянняў экіпажу і таго, што пасажыры прытрымліваліся інструкцый», – сказала яна.

Паводле ейных словаў, да таго, як пачаць лятаць, новыя чальцы экіпажу цягам трох тыдняў праходзяць дасканалую падрыхтоўку правядзення эвакуацыі. Навучанне паўтараецца кожны год.

«Мы здаем пісьмовы іспыт, абмяркоўваем канкрэтныя выпадкі і праходзім практычныя заняткі паводле розных сцэнароў, напрыклад, калі самалёту даводзіцца здзяйсняць пасадку на ваду ці калі на борце ўзнікае пажар. Тэхнічны персанал таксама ўдзельнічае ў такіх трэніроўках», – кажа былая сцюардэса, якая пакінула кампанію 10 гадоў таму.

Пілот адной з авіякампаній Паўднёва-Усходняй Азіі, які таксама гаварыў на ўмовах ананімнасці, сказаў, што падрыхтоўка, якую прайшоў экіпаж, дапамагла хутка эвакуявацца.

«Павінен сказаць, што гэта было неверагодна. Я думаю, што ў гэтым выпадку ўсё адбылося дзякуючы трэніроўкам. У такой сітуацыі ў вас сапраўды няма часу на роздумы, таму вы проста робіце тое, чаму вас вучылі», – сказаў ён.

Паводле сучасных правілаў, у любой няштатнай сітуацыі, якая патрабуе эвакуацыі, усе пасажыры самалёта павінны пакінуць яго за 90 секундаў.

Для атрымання міжнароднага сертыфіката на палёты вытворца пасажырскага самалёта павінен прадэманстраваць, што гэтае патрабаванне выконваецца. У іспытах на эвакуацыю часам удзельнічаюць рэальныя пасажыры, дадаў пілот.

Пасля шэрагу аварый у мінулым правілы авіяцыйнай бяспекі сталі значна больш строгімі.

Напрыклад, сутыкненне двух самалётаў Boeing 747 у аэрапорце Лос-Радэас на востраве Тэнэрыфэ ў 1977 годзе, у выніку якога загінулі 583 чалавекі (гэта па-ранейшаму самая смяротная аварыя ў гісторыі авіяцыі), прывяло да перагляду правілаў зносінаў пілотаў у кабіне і тэрміналогіі для камунікацыі з наземнымі службамі. Прычынай той катастрофы стала непаразуменне паміж экіпажам і авіядыспетчарамі.

У гісторыі кампаніі Japan Airlines ёсць свая змрочная старонка: у жніўні 1985 года рэйс 123, які рухаўся ў Осаку, урэзаўся ў гару неўзабаве пасля ўзлёту з такійскага аэрапорта «Ханэда». Прычынай катастрофы сталі памылкі пры рамонце, дапушчаныя кампаніяй Boeing, якая вырабляла самалёт. З 524 чалавек, якія знаходзіліся на борце, выжылі толькі чацвёра.