Былога журналіста Андрэя Толчына асудзілі на 2,5 гады калоніі

Пастанову вынес «суддзя» Дзмітрый Казлоў.

Гомельскі абласны суд 21 сакавіка вынес пастанову паводле крымінальнай справы, распачатай на былога журналіста Андрэя Толчына. Суддзя Дзмітрый Казлоў пакараў яго 2 гадамі і 6 месяцамі калоніі за «паклёп на Лукашэнку» і за «садзейнічанне экстрэмісцкай дзейнасці», паведамляе «Радыё Свабода».

Толчыну 64 гады, у яго шэраг хранічных захворванняў. Да 2020 года супрацоўнічаў з незалежнымі СМІ Беларусі. Былога журналіста затрымалі 27 верасня 2023 года, з таго часу ён знаходзіўся ў гомельскім СІЗА. Ягоны стан здароўя апошнім часам моцна пагоршыўся.

Андрэй Толчын даглядаў хворую сястру, якая памерла прыкладна за два тыдні да яго затрымання. Пракурор прасіў для яго 3 гады калоніі.