Двух менчукоў асудзілі за нумарныя рамкі з «Пагоняй» на аўтамабілях

Разгледзелі як “пікетаванне”.

Міліцыя затрымала двух жыхароў Менска, на аўтамабілях якіх былі ўсталяваныя рамкі для нумароў з выявай герба "Пагоня". Абодва выпадкі разглядаліся ў судзе Ленінскага раёна ў канцы лютага - пачатку сакавіка. Пра іх стала вядома пасля публікацыі пастаноў суда, піша zerkalo.io.

5 сакавіка затрымалі ўраджэнца Берасцейскай вобласці, які працуе наладчыкам абсталявання ў адной са сталічных кампаній. Яго аўто на тэрыторыі Кастрычніцкага раёна Менска заўважыў міліцыянер Дэпартамента аховы. Нумарныя рамкі аўтамабіля былі з гербам "Пагоня".

“Паколькі цяпер згаданы сімвал выкарыстоўваецца пэўнай групай грамадзян як сімвал, які ідэнтыфікуе і прапагандуе грамадска-палітычныя інтарэсы пратэстнай накіраванасці, была прынятая пастанова аб затрыманні кіроўцы аўтамабіля, якім быў М.”, — гаворыцца ў матэрыялах справы.

Мужчына правёў ноч у ІЧУ, суд прайшоў на наступны дзень. Мянчук не прызнаў сябе вінаватым у правапарушэнні. Ён не адмаўляў, што на ягоным аўто былі рамкі з “Пагоняй”, аднак намагаў на тым, што ён не выказваў імі ніякіх “грамадска-палітычных інтарэсаў”. Мужчына сказаў, што набыў аўто год таму ўжо з такімі рамкамі. Тады ён спытаў у прадаўца, ці не будзе праблем з-за "Пагоні", той адказаў, што "не павінна быць", і новы гаспадар проста працягнуў выкарыстоўваць рамкі.

Аднак суд палічыў, што гэта наадварот пацвярджае яго віну, бо ён, купляючы аўто, звярнуў увагу на сімвал герба і разумеў яго значэнне, але не пазбавіўся рамак. У выніку сітуацыю прызналі пікетаваннем без дазволу гарвыканкама (ч. 1 арт. 24.23 КоАП).

“Н. дэманстраваў на рамцы для нумарнога знака аўтамабіля выява герба П. у якасці сімволікі пратэстнага характару менавіта з мэтай публічнага выказвання сваіх грамадска-палітычных інтарэсаў, што стала даступна нявызначанаму колу асоб, у сувязі з чым прыходжу да высновы, што апошні прыняў удзел у пікетаванні”, - рэзюмаваў суддзя.

Мужчыну прызначылі 13 дзён адміністратыўнага арышту.

Падобны выпадак адбыўся ў Ленінскім раёне Менска 21 лютага. А 15.30 міліцыянт заўважыў на адной з вуліц аўтамабіль з “Пагоняй” на нумарных рамках, кіроўца быў затрыманы. Праз два дні адбыўся суд.

Мужчына, працаўнік прыватнай кампаніі, прызнаў наяўнасць рамак, але сцвярджаў, што купіў іх некалькі гадоў таму і да цяперашняга часу ўжо даўно забыўся, што на іх ёсць сімвал "Пагоні". Ён запэўніваў, што, перасоўваючыся на сваім аўтамабілі з такімі рамкамі, не пераследваў ніякіх палітычных мэт.

Суд чакана не паверыў мінчаніну. Яго прызналі вінаватым у несанкцыянаваным пікетаванні і прыгаварылі да 11 дзён арышту.