«Не магла нават уявіць, што такая сетка збанкрутуе»

Прадаўцы расказалі, што адбываецца з «Востравам чысціні».

Крамы сеткі «Востраў чысціні і густу» то прыпыняюць працу, то аднаўляюць. У сацсетках вірусяцца відэа са скаргамі супрацоўнікаў на ўмовы працы і затрымкі заробкаў. Пра сітуацыю ў крамах сеткі BAR24 на ўмовах ананімнасці расказалі баранавіцкія прадаўцы.

Сітуацыя з «Востравам чысціні» апошнія некалькі месяцаў практычна не сыходзіць з навінаў. Гэтая сетка без тлумачэння прычынаў масава прыпыняе працу і зачыняе крамы па ўсёй краіне. То заяўляе пра вяртанне на рынак і дзеліцца аптымістычнымі планамі на будучыню. А яшчэ праз некаторы час становіцца вядома, што кампанія ліквідуе свае юрыдычныя асобы.

«Пачалі заўважаць, што пастаўкі тавараў паменшыліся»

Першыя званочкі будучых вялікіх праблемаў з «Выспам чысціні», паводле словаў супрацоўнікаў, пачаліся, калі акрамя крамаў бытавой хіміі ў сеткі з'явіліся аптэкі.

– Калі пачалі адчыняць аптэкі, у супрацоўнікаў сталі зразаць заробкі. Спасылаліся на тое, што патрэбныя грошы на адкрыццё аптэк. Але чаму нас гэта мусіла хваляваць? Аптэкі збіраецеся адчыняць вы, а грошы ўтрымліваеце з нас. Па-мойму, неяк нелагічна, – успамінае адзін з былых супрацоўнікаў.

Далей – больш.

– Спачатку мы пачалі заўважаць, што пастаўкі тавараў зменшыліся. Проста значна, калі на паліцах сталі расцягваць тавар. Потым пакупнікі гэта заўважылі. І пайшло-паехала, – апавядае былы супрацоўнік. – Калі ў Баранавічах пачалі зачыняць нерэнтабельныя крамы, я сышоў, бо меркаваў, што далей нічога добрага не будзе. І пра свой сыход ні кроплі не шкадую. Але мая жонка там «працуе» да гэтага часу. У гэтым месяцы ёй упершыню на маёй памяці затрымалі заробак. На цэлых дзесяць дзён. Не ўяўляю, як людзі, у каго ёсць дзеці, ці тыя ж маці, якія выхоўваюць дзяцей адны, там працуюць.

«Сітуацыя сумная»

Цяпер, паводле словаў супрацоўнікаў, у крамах «сітуацыя сумная». Многія гандлёвыя аб'екты ў Баранавічах зачыненыя. Паставак тавараў няма, з крамаў іх таксама ніхто не вывозіць. Хтосьці прыходзіць на працу і проста адседжвае там нейкія гадзіны, хтосьці і зусім сядзіць дома.

– Цяпер мы сядзім дома. Спачатку ў нашым гандлёвым аб'екце адключылі святло праз нявыплату. А нядаўна паведамілі, што нашу краму зачыняюць. Заробак за красавік нам выплацілі, але з затрымкай. Што будзе далей, ніхто рэальна не ведае, – расказвае супрацоўніца адной з крамаў.

Людзі не ведаюць, што ім рабіць. Нехта ўжо пачаў шукаць працу. Хтосьці пастанавіў проста чакаць, бо са звальненнем, гавораць прадаўцы, таксама могуць узнікнуць праблемы.

– Мы ўсе матэрыяльна абавязаныя. Пакуль не пройдзе пераўлік, нікога не звольняць. Але тавар не забіраюць, бо, гавораць, нават машыны заправіць няма чым. Таму мы з калегамі пастанавілі чакаць да апошняга, – адзначыла супрацоўніца.

Больш за ўсё ў сітуацыі, якая склалася, людзей абурае, што ім «ніхто нічога не кажа». І пра ўсе важныя навіны яны даведваюцца з інтэрнэту.

– Крыўдна, што нічога не тлумачаць. Яшчэ ў красавіку да нас прыязджаў Віктар Іосіфавіч (Ромук, уладальнік сеткі, – Аўт.), сказаў, што будзе ўсё добра. А ўжо праз тыдзень высветлілася, што нас зачыняюць, – адзначае супрацоўніца адной з баранавіцкіх крамаў сеткі. – Вельмі шкада, вядома, што так адбылося. У нас быў дружны калектыў, і праца мне падабалася. Не магла нават уявіць, што такая сетка збанкрутуе. Ударам для мяне гэта не стала, бо муж добра зарабляе, і я магу не працаваць. Але шкадаванні ёсць.