Зяленскі са спаленай друкарні ў Харкаве звярнуўся да свету
4- 26.05.2024, 12:17
- 6,778
![Зяленскі са спаленай друкарні ў Харкаве звярнуўся да свету](https://i.c97.org/ai/596508/aux-head-1716713928-20240526_zelenski_360.jpg)
Пра што гаварыў прэзідэнт Украіны?
Прэзідэнт Украіны Уладзімір Зяленскі з Харкава запісаў зварот да лідараў свету, каб тыя дапамаглі ўсталяваць сапраўдны мір, а не перапынак паміж ударамі.
«Для іх гэта задавальненне – спальваць. Мы ўсе ведаем, з кім маем справу. Расеяй кіруюць людзі, якія хочуць зрабіць нормай спальваць жыццё, разбураць гарады і вёскі, падзяляць народы і сціраць нацыянальныя межы вайной.
Няма нацыі, якая здольная спыніць такую вайну толькі сваімі намаганнямі. Патрабуецца ўдзел лідараў свету.
Ці хоча Расея дыялогу? Украіна мае самы вялікі ў свеце досвед падману з боку Расеі на перамовах. Падману, які, сярод іншага, быў прыкрыццём Расеі для падрыхтоўкі гэтай вайны. І менавіта таму патрэбныя глабальныя намаганні – саміт міру з удзелам лідараў, якіх Расеі не падмануць», – сказаў Зяленскі.
Зяленскі дадаў, што Украіна мае пацвярджэнне ўдзелу ўжо больш як 80 дзяржаваў.
«Я звяртаюся да лідараў свету, якія пакуль што ўбаку ад глабальных намаганняў у падрыхтоўцы саміту міру: да прэзідэнта Байдэна, лідара Злучаных Штатаў, да прэзідэнта Сі, лідара Кітая. Мы не хочам, каб, гэтак сама як гэтыя кнігі, згарэў Статут ААН. Спадзяюся, не хочаце і вы. Калі ласка, выявіце ваша лідарства ў набліжэнні міру – міру, а не паўзы паміж ударамі.
Высілкі сусветнай большасці – гэта найлепшая гарантыя выканання абавязальніцтваў. Калі ласка, падтрымайце саміт міру сваім асабістым лідарствам і ўдзелам», – сказаў Зяленскі.
Саміт у Швэйцарыі пройдзе 15–16 чэрвеня, а папярэднічаць яму будзе сустрэча лідараў краінаў G7 у Італіі.