Макрон прыбыў у Нямеччыну з дзяржаўным візітам

Упершыню за 24 гады.

Прэзідэнт Францыі Эмануэль Макрон у нядзелю, 26 траўня, прыбыў у Нямеччыну з першым дзяржаўным візітам за 24 гады. Да гэтага французскі лідар прыязджаў у ФРГ толькі з працоўнымі візітамі, паведамляе «Нямецкая хваля».

Праграма дзяржаўнага візіту Макрона ў ФРГ

Увечары ў нядзелю, 26 траўня, дзяржаўны банкет для прэзідэнта Францыі і яго жонкі ў сваім палацы ў Бельвю ў Берліне зладзіць прэзідэнт ФРГ Франк-Вальтэр Штайнмаер (Frank-Walter Steinmeier). На наступны дзень абодва прэзідэнты адправяцца ў Дрэздэн, які размешчаны на ўсходзе Нямеччыны, дзе Макрон выступіць з прамовай.

У аўторак, 30 траўня, Макрон і Штайнмаер наведаюць Мюнстэр на захадзе краіны. Увечары таго ж дня адбудзецца сустрэча французскага лідара з федэральным канцлерам ФРГ Олафам Шольцам (Olaf Scholz) пад Берлінам.

Візіт быў перанесены амаль на год

Паводле плану дзяржаўны візіт Эмануэля Макрона ў ФРГ павінен быў адбыцца яшчэ ў ліпені 2023 года, але ў апошні момант быў перанесены праз беспарадкі ў Францыі.

Рознагалоссі паміж Францыяй і ФРГ на фоне візіту Макрона.

Напярэдадні перамоў паміж Олафам Шольцам і Эмануэлем Макронам эксперты і палітыкі ўспамінаюць вялікую колькасць назапашаных рознагалоссяў паміж ФРГ і Францыяй.

Так, цяпер Парыж адданы атамнай энэргетыцы, у той час як Берлін, наадварот, закрыў апошнія ядзерныя рэактары ў краіне. Макрон заяўляў, што не гатовы выключаць адпраўкі салдат ва Украіну, а Шольц выступіў рэзка супраць гэтай ідэі.

Як заявіў лідар найбуйнейшай апазіцыйнай партыі Нямеччыны Хрысціянска-дэмакратычны саюз (ХДС) Фрыдрых Мерц (Friedrich Merz), стасункі ФРГ і Францыі зараз горшыя, чым цягам дзесяцігоддзяў. На яго думку, паміж краінамі існуе «раскол» у пытанні падтрымкі Украіны.