Беларускі палітолаг звярнуўся да амбасадара Ізраіля наконт антысеміцкай заявы Лукашэнкі

Дыктатар павінен сутыкнуцца з наступствамі.

У пятніцу, 14 чэрвеня, Лукашэнка расказваў пра карупцыйную справу, у якой замешаны яго былы памочнік — інспектар Віцебскай вобласці, экс-міністр сельскай гаспадаркі і харчавання Ігар Брыло. Дыктатар адзначыў, што з трох дзясяткаў чалавек, якія праходзяць паводле крымінальнай справы, «больш за палову габрэяў». Гэта заява антысеміцкая. Пакуль рэакцыі на ягоныя словы з боку Ізраіля не было.

Беларускі палітолаг і блогер Зміцер Балкунец звярнуўся ў пасольства Ізраіля.

- Ізраіль і габрэйская грамада ва ўсім свеце павінны даць сваю ацэнку гэтым словам, паколькі яны не толькі абражаюць габрэйскі народ, але і спрыяюць распальванню антысеміцкіх настрояў, - напісаў Зміцер Балкунец у сваім тэлеграм-канале. - Звязванне этнічнай прыналежнасці са злачыннай дзейнасцю з'яўляецца недапушчальным. Антысемітызм ва ўсялякай форме павінен быць рашуча асуджаны. Заява Лукашэнкі не павінная заставацца без наступстваў. Напісаў ліст амбасадару Ізраіля ў Беларусі і прэзідэнту Канферэнцыі еўрапейскіх рабінаў. Папрасіў іх звярнуць увагу на антысеміцкую заяву Лукашэнкі і заклікаць міжнародную супольнасць і праваабарончыя арганізацыі адрэагаваць.