Навукоўцы паставілі кропку ў дыскусіі, дзе першапачаткова знаходзіўся Менск

Сталіца Беларусі можа быць на некалькі дзесяцігоддзяў старэйшай.

Навукоўцы Акадэміі навук, здаецца, паставілі кропку ў дыскусіі, дзе запачаткаваўся Менск. Пра гэта паведаміў БелТА загадчык Цэнтра археалогіі Беларусі Інстытута гісторыі НАН Аляксей Аўласовіч.

«Вялася навуковая і грамадская дыскусія на тэму таго, што з'яўляецца зыходным пунктам у фармаванні будучай сталіцы незалежнай Беларусі: месца зліцця Свіслачы і Нямігі альбо месца, дзе ручай Дунай упадае ў рэчку Менку. Мы ведалі, што ў XI стагоддзі існавалі два селішчы і там, і там, абодва ўмацаваныя, але не быў зразумелы іх статус, як яны суадносяцца адзін з адным. І толькі археалагічныя даследаванні нам паказалі, што для канца X – першай паловы XI стагоддзя гэта былі несупастаўныя велічыні.

У гэты перыяд на Менцы быў сапраўдны горад з цудоўнай матэрыяльнай культурай, а на Нямізе хоць і было селішча, але нічога падобнага не было», – расказаў Аляксей Аўласовіч.

Так, археолагі знайшлі на Менцы шэраг значных артэфактаў канца X – першай паловы XI стагоддзя.

«Пышныя паясныя наборы паказваюць прысутнасць тут дружыннікаў. Выяўлены і пісьмовыя прылады. Знойдзена таксама некалькі донцаў гаршкоў з пячаткамі княжага трызубца Ізяслава – старэйшага сына Уладзіміра і Рагнеды. Гэта паказвае на прысутнасць тут княжацкай адміністрацыі і ў цэлым пашырэнне межаў Полацкага княства.

Атрымліваецца, што тут быў адзін са значных паўднёвых гарадоў на полацкай зямлі, у той час як на Нямізе ў першай палове XI стагоддзя нічога падобнага не было. Там сапраўды было селішча, але такіх статусных рэчаў там на гэты час не назіраецца», – адзначыў навуковец.

Далей адбылася летапісная бітва 1067 года, калі князі Яраславічы прыступам узялі старажытны Менск.

«І мы бачым, што пачынаючы з сярэдзіны XI стагоддзя і ўжо тым больш у XII стагоддзі на Менцы больш бедныя знаходкі. Гэта значыць, горад згасае. А на Нямізе, наадварот, другая палова XI стагоддзя і XII стагоддзе проста фантануюць статуснымі рэчамі», – звярнуў увагу Аляксей Аўласовіч.

«Такім чынам, мы можам паставіць кропку ў гэтай дыскусіі. Было два селішчы. Аднак Менск нарадзіўся менавіта на Менцы. А далей адбыўся перанос духу горада на Нямігу ўжо пры Глебу Менскім», – падсумаваў загадчык Цэнтра археалогіі Беларусі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com