У палітвязня і журналіста Ігара Ільяша пагоршылася здароўе

Жонка палітвязня б’е трывогу.

У беларускага журналіста, палітвязня Ігара Ільяша пагоршылася здароўе пасля таго, як напрыканцы 2025 года яго накіравалі ў бабруйскую папраўчую калонію № 2. Пра гэта «Радыё Свабода» расказала ягоная жонка, журналістка Кацярына Андрэева.

Паводле яе слоў, яна не мае магчымасці перапісвацца з мужам або званіць яму, аднак падтрымлівае сувязь з крыніцамі, якіх лічыць добра інфармаванымі пра становішча Ігара. Паводле іхняй інфармацыі, пасля этапавання ў калонію з самага пачатку, яшчэ падчас каранціну, ён двойчы знаходзіўся ў штрафным ізалятары (ШІЗА) па 15 сутак, а потым яго накіроўвалі туды як мінімум яшчэ два разы. Усяго Ігар ужо правёў у ШІЗА каля 60 дзён.

— У бабруйскай калоніі, як мне расказалі, камеры ШІЗА маленькія і знаходзяцца ў паўпадвальным памяшканні. То бок там вельмі высокая вільготнасць, а месца для руху амаль няма. Пасля выхаду з ШІЗА Ігар адразу пачаў скардзіцца на ацёкі: у яго ацякалі ногі і рукі. Потым яго накіравалі працаваць на перапрацоўку гумы, напрыклад, аўтамабільных шын. Гэта таксама вельмі дрэнна адбілася на здароўі — у яго з’явіліся праблемы з каардынацыяй рухаў, асабліва правай рукі. А калі ён апошні раз выйшаў з ШІЗА, людзі бачылі, што ён кульгае. Акрамя таго, праз знаходжанне ў ШІЗА ў яго рэзка пагоршыўся зрок, — расказала Кацярына Андрэева.

Яшчэ адно сур’ёзнае наступства для здароўя Ігара Ільяша, паводле яе слоў, — гэта моцнае пахуданне.

Кацярына тлумачыць гэта «бедным харчаваннем у калоніі» і тым, што, паколькі Ігара прызналі «экстрэмістам», ён можа набываць прадукты ў турэмнай краме толькі на суму ў дзве базавыя велічыні (90 рублёў) і толькі тады, калі не знаходзіцца ў ШІЗА.

Акрамя таго, Ігар пазбаўлены магчымасці атрымліваць харчовыя перадачы з волі, адзначыла Кацярына Андрэева.

Пры гэтым маральны стан мужа не выклікае ў яе вялікай трывогі, бо ён добра трымаецца, нягледзячы на сітуацыю.

— Ягонае здароўе — гэта тое, што пастаянна прыносіць мне боль, а з усім астатнім, я ведаю, ён справіцца. Маральны стан у яго добры. Ён шмат чытае, у тым ліку знаходзіць сваю ўлюбёную гістарычную літаратуру. Ведаю, што паход у бібліятэку для яго важнейшы, чым паход у турэмную краму, — расказала Кацярына Андрэева пра свайго мужа Ігара Ільяша.

18 ліпеня Ігар адзначае дзень нараджэння — яму спаўняецца 38 гадоў. Ён ужо другі раз сустракае свой дзень у зняволенні.

19 сакавіка гэтага года Лукашэнка памілаваў 250 палітвязняў, 15 з якіх, уключна з журналісткай Кацярынай Андрэевай, былі вывезеныя ў Літву. Вызваленне стала магчымым пасля перамоваў, якія ў Мінску правёў Джон Коул, спецыяльны пасланнік прэзідэнта ЗША Дональда Трампа.

Кацярына Андрэева спадзяецца, што ў выніку падобных перамоваў на волю выйдзе і яе муж Ігар, а таксама іншыя зняволеныя журналісты і ўсе беларускія палітвязні.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com