Еўрапейскі цэнтральны банк прадставіў новыя банкноты еўра

Фотафакт.

Еўрапейскі цэнтральны банк (ЕЦБ), адказны за выпуск агульнай валюты 20 краін ЕС, правёў папярэдні адбор канкрэтных матываў, якія могуць быць на іх выяўлены. У бліжэйшай будучыні купюры могуць упрыгожваць знакамітыя еўрапейцы, аб’екты культуры або прадстаўнікі свету прыроды, піша Deutsche Welle.

У канцы 2023 года ЕЦБ назваў два тэматычныя напрамкі для афармлення новых папяровых грашовых знакаў у еўразоне. Адзін з іх — важныя для еўрапейскай культуры і навукі асобы і аб’екты, другі — еўрапейскія птушкі і рачныя ландшафты. Да гэтага жыхары краін Еўрасаюза мелі магчымасць шляхам анлайн-галасавання выбраць усяго з сямі тэматычных блокаў — у ім узялі ўдзел больш за 365 тысяч чалавек. Для вызначэння будучай тэматыкі ў афармленні купюр таксама ўлічвалася меркаванне экспертаў, якія прадстаўляюць розныя дысцыпліны і еўрапейскія краіны.

Бетховен і да Вінчы або зімародак і шылаклюўка — на купюрах еўра

Тэма «Еўрапейская культура» прысвечана выбітным асобам, якія ўнеслі свой уклад у развіццё культурнай спадчыны Еўропы, а таксама культурнай дзейнасці і аб’ектам, якім адводзіцца важнае значэнне ў фарміраванні еўрапейскай ідэнтычнасці. Так, на купюры наміналам дзесяць еўра можа быць выяўлены нямецкі кампазітар Людвіг ван Бетховен, на адваротным баку — песенны фестываль. На 20 еўра могуць размясціць партрэт лаўрэаткі Нобелеўскай прэміі Марыі Кюры, на рэверсе — вучэбную аўдыторыю ў школе або ўніверсітэце. 100 еўра могуць упрыгожыць мастак і скульптар Леанарда да Вінчы і стрыт-арт — на адваротным баку.

Прыродны тэматычны напрамак адлюстроўвае ўстойлівасць і разнастайнасць прыродных экасістэм Еўропы. Розныя ўчасткі рэк і віды птушак будуць нагадваць пра важнасць захавання прыроды. Калі канчатковы выбар зробяць на карысць гэтай групы ілюстрацый, то на банкноце ў 10 еўра можа з’явіцца зімародак каля вадападу. Месца на купюры наміналам 20 еўра ўдастоіцца адна з самых ярка афарбаваных птушак Еўропы — залатая шчурка ў пясчаным валу шырокай рачной даліны. На 50 еўра з’явіцца белы бусел, а 100-эўравая банкнота будзе праілюстраваная шылаклюўкай, што шукае ежу на мелкаводдзі. На адваротным баку такіх купюр будуць выяўлены еўрапейскія інстытуты, якія нагадваюць пра асноватворныя каштоўнасці праекта «Еўропа», што ўключаюць у сябе ахову навакольнага асяроддзя: Еўрапарламент, Еўракамісія, ЕЦБ, Рада Еўропы і іншыя.

Навошта патрэбны рэдызайн банкнотаў еўра

«Новыя банкноты будуць сімвалізаваць нашу агульную ідэнтычнасць і разнастайнасць, якая робіць Еўропу моцнай», — патлумачыла кіраўніца ЕЦБ Крысцін Лагард. На наступным этапе Еўрапейскі цэнтрабанк вызначыць склад журы і абвесціць конкурс сярод дызайнераў у ЕС — гэта адбудзецца ўжо ў гэтым годзе. У 2026-м адабраныя эскізы павінны прадставіць грамадскасці, будзе апытана меркаванне жыхароў Еўропы. Затым будзе прынята канчатковае рашэнне адносна знешняга выгляду новых купюр. У абароце яны з’явяцца толькі праз некалькі гадоў.

Працэс рэдызайну банкнотаў быў ініцыяваны ў канцы 2021 года ЕЦБ. Рэгулярная распрацоўка новых серый банкнотаў неабходная для барацьбы з падробкай грошай. ЕЦБ таксама імкнецца скараціць шкоду для навакольнага асяроддзя — тэрмін службы новых банкнотаў павінен быць даўжэйшы.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com