Малярка за год назбірала на аднапакаёўку ў Мінску і расказала, як ёй гэта ўдалося

Ад рэакцыі каментатараў яна была ў шоку.

Малярка з Мінска расказала ў TikTok, як за год зарабіла на кватэру ў сталіцы. Каментары некаторых людзей так яе шакавалі, што на наступны дзень яна выклала відэа са словамі: «За што вы мяне ўсе ненавідзіце?»

Крысціна — малярка з Мінска. Жанчына разведзеная, у яе двое дзяцей. Сёлета яна выйшла з дэкрэту на працу — на будоўлю. А нядаўна расказала на сваёй старонцы ў TikTok, што за год змагла зарабіць на кватэру ў сталіцы. Яе нерухомасць — гэта «самая простая» аднапакаёўка, набытая на другасным рынку, а не «наварочаная» новабудоўля ў «Minsk World», піша «Зеркало».

Як жа ёй удалося назбіраць патрэбную суму?

— Столькі розных каментарыяў было з гэтай нагоды. Два асноўныя — што мне кватэру купілі бацькі або што яе падарыў былы муж пасля разводу, — кажа ў відэа жанчына. — Пачну з таго, што мае бацькі ўжо даўно памерлі, адышлі ў іншы свет.

Па яе словах, расла яна не ў вельмі спрыяльнай сям'і. Дом, дзе яна жыла ў дзяцінстве, застаўся ў вёсцы.

— Я да яго ніякага дачынення не маю, яго дзеляць сваякі, — прызналася ў відэа Крысціна. — Таму гэты варыянт адпадае.

Што да версіі з падарункам ад былога мужа, то яе аўтарка акаўнта таксама абвергла.

— На жаль, у майго мужа не было магчымасцяў пакінуць нам нейкае жыллё. Але, думаю, калі б ён мог, ён бы гэта зрабіў, — падзялілася яна.

Адзінае, што пара набыла за дзевяць гадоў у шлюбе, — дачны ўчастак, без хаты. Яны яго прадалі і падзялілі грошы напалову.

— Вось і ўсё. А кватэру я купіла самастойна, — адзначыла жанчына, сказаўшы, што нерухомасць узяла такую, на якую на той момант хапіла зберажэнняў. — Дзе зарабіла? Тут, у TikTok. Так, процьма бяссонных начэй, але яно таго варта.

Судзячы па словах маладой маці, зрабіць гэта атрымалася шмат у чым дзякуючы стрымам. На яе профіль падпісана больш за 520 тысяч уліковых запісаў.

За чатыры дні відэа-прызнанне Крысціны паглядзелі больш за 279 тысяч разоў. Пад ім звыш 300 каментарыяў. Нягледзячы на тое, што пад пастом нямала пазітыўных водгукаў, негатыву таксама хапала. У выніку жанчына запісала адказ хэйтэрам.

— Каментары проста ўводзяць мяне ў шок. Аказваецца, мяне столькі людзей ненавідзіць, — кажа яна ў роліку, які выклала на наступны дзень. — А галоўнае пытанне: за што? Што я вам зрабіла? За што вы ўсе мяне ненавідзіце? Толькі таму, што ў мяне нешта атрымалася, а ў вас — не? Пры чым тут я? Шчыра, мне страшна выходзіць на вуліцу. Бо ўсе гэтыя людзі знаходзяцца вакол нас. І яны могуць ненавідзець цябе проста так, не ведаючы цябе.

Па яе словах, пасля публікацыі відэа пра кватэру на яе прамы эфір прыйшлі гледачы, якія пісалі абразы.

— Потым адпраўлялі скаргі ў TikTok, каб мой эфір заблакіравалі. Вось вы разумееце? Проста таму, што чалавек зайздросціць. Будзьце хоць крыху дабрэйшыя, можа быць, — звярнулася яна да людзей. — Я для вас ніхто, вы для мяне таксама. Я вам нічога дрэннага не зрабіла. За што вы мяне ненавідзіце?

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com