Мары «ўзяць нешта за тры дні»

Магічныя заклінанні адбіліся ў мазгах крамлёўскіх пенсіянераў.

«Польшча спыніць сваё існаванне за два-тры дні», – заявіў учора былы кіраўнік ФСБ і сябар Пуціна Мікалай Патрушаў. Як бы ў адказ на гэта, Урсула фон дэр Ляен прапанавала стварыць еўрапейскі Савет бяспекі, незалежны ад НАТА, але з удзелам Украіны.

Здаецца, магічныя мары «ўзяць нешта за тры дні», быццам турэмная татуіроўка, адбіліся ў мазгах крамлёўскіх пенсіянераў. Тыя самыя людзі, што абяцалі ўзяць за тры дні Кіеў і называлі тэрміны выхаду да Ла-Манша, за пяць гадоў поўнамаштабнай вайны мараць выйсці на ўскраіны раённага цэнтра ў Данецкай вобласці. Расіі давялося выдаткаваць рэшткі золатавалютных рэзерваў, знішчыць тэхніку, якую яшчэ з часоў СССР рыхтавалі да «вайны з НАТА», і страціць некалькі сотняў тысяч сваіх вайскоўцаў. Але нават гэтага не хапіла.

Не маючы магчымасці перамагчы на фронце, Пуцін спрабуе распаўсюдзіць вайну на мірныя тэрыторыі. Новыя расійскія дроны і ракеты прызначаныя не толькі для фронту, але і для удараў па мірных жыхарах у тыле. Да гэтага ж належаць запуск ракеты ў бок ваеннага верталёта Даніі, баявыя дроны ў аэрапортах Германіі, а таксама расійская дыверсійная група, раскрытая Генпракуратурай ЗША, якая павінна была рыхтаваць забойствы і дыверсіі ў ЗША і Еўропе.

Навіны апошніх тыдняў паказваюць, што вайна паступова распаўзаецца. Яна вядзецца ўжо не толькі супраць армій, але і супраць грамадстваў. Паколькі Украіну падтрымліваюць грамадствы Еўропы і ЗША, Расія спрабуе перанесці ціск і на іх. Падабаецца гэта ці не, але Еўропа ўжо ўцягнутая ў супрацьстаянне з Расіяй. Пакуль што яно праяўляецца пераважна ў форме гібрыдных атак. І менавіта ў гэтым іх асаблівасць: складана вызначыць момант, калі супрацьстаянне ўжо перарасло ў вайну.

Калі яшчэ некалькі гадоў таму можна было спадзявацца спыніць Пуціна з дапамогай дыпламатыі, дык сёння ў гэта амаль ніхто не верыць. ЗША ўжо выпрабавалі розныя дыпламатычныя стымулы: ад перспектыў гандлю да асабістай сустрэчы прэзідэнтаў. Іншы інструмент – узмацненне ціску на Расію. У прыватнасці, шляхам пашырэння дапамогі Украіне і ўзмацнення кантролю за выкананнем ужо ўведзеных санкцый.

Усё гэта не азначае, што дыпламатычныя намаганні трэба спыніць. Але гэта паказвае, што вайна будзе працягвацца да тых часоў, пакуль Пуціна не спыняць. Менавіта дзеля гэтага Еўракамісія і спрабуе стварыць незалежны ад НАТА «еўрапейскі Савет бяспекі» з Украінай у складзе. Бо пра планы «Польшча за тры дні» ўжо ніхто не хавае.

Мікалай Княжыцкі, Facebook

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com