Абвал на азіяцкіх біржах: мінус 4%

Абвальнае падзенне катыровак ідзе сёння на асноўных фінансавых пляцоўках Усходняй Азіі, якую ліхаманіць з прычыны патаннення амерыканскага даляра і нарастальных праблем у эканоміцы ЗША – на асноўным экспартным рынку. За першую гадзіну вячэрняга гандлю на 3,75% упаў індэкс Nikkei, які фіксуе курсы акцый 225 вядучых кампаній Японіі. Ён страціў 584,91 пункты і скаціўся ніжэй за рысу ў 15 тысяч пунктаў. Апошнім разам Nikkei быў на гэтым узроўні ў ліпені мінулага года, нагадвае ІТАР-ТАСС.

На 4,1% упаў кампазітны індэкс сеульскай біржы, на 4% – Hang Seng у Ганконгу.

Курс даляра ў Токіо ў некаторыя моманты сённяшняга гандлю падаў ніжэй за рысу 110 ен. Гэта самы нізкі ўзровень за апошнія паўтара гады, і эксперты прадракаюць амерыканскай валюце далейшае патанненне. Недавер да даляра выкліканы паведамленнямі пра тое, што вядучыя фінансавыя кампаніі ЗША рыхтуюцца да спісання буйных масіваў нявернутых крэдытаў пад куплю жылля. Раней такую аперацыю ўжо змушаныя былі правесці такія гіганты, як Citigroup і Morgan Stanley.

У сераду кіраўнік Федэральнай рэзервовай сістэмы ЗША Бэн Бернанке паведаміў, што страты з прычыны крызісу ў сістэме іпатэчнага крэдытавання Злучаных Штатаў склалі ўжо каля 150 млрд. даляраў. Паводле яго слоў, гэта можа запаволіць тэмпы прыросту эканомікі краіны. У пятніцу, у прыватнасці, было адзначанае чарговае падзенне курсаў акцый у Нью-Ёрку.

Патанненне даляра падрывае пазіцыі вядучых кампаній Усходняй Азіі, якія шмат у чым працуюць на экспарт. Сёння, напрыклад, на 3,8% патаннелі акцыі японскай Sharp, на 3,2% паўднёвакарэйскай Hyundai Heavy Industries – найбуйнейшай у свеце суднабудаўнічай кампаніі.