Казка пра беларускі рубель

Кіраўнік Нацбанку Пётр Пракаповіч зноў даклаў Аляксандру Лукашэнку пра непахіснасць нацыянальнай валюты. Аднак насамрэч за год беларускі рубель істотна патаннеў не толькі па дачыненні да еўра, але і да шмат якіх іншых валют, у тым ліку малдаўскага лею і кыргызскага сому.

«Лепш за ўсё зберажэнні захоўваць у беларускіх рублях, – агітаваў насельніцтва ўсё той жа Пётр Пракаповіч на нядаўняй прэс-канферэнцыі, – па іх самая вялікая прыбытковасць і гэта цяпер самая ўстойлівая валюта ў Беларусі».

У пацверджанне гэтага тэзіса кіраўнік Нацбанку спаслаўся на тое, што курс беларускага рубля па дачыненні да даляра ЗША застаецца практычна нязменным цягам 3 апошніх гадоў. Гэта праўда. Але не ўся.

Пракаповіч маўчаў пра тое, што за апошнія гады сам даляр ладна абясцэніўся. Таму браць яго за асноўную кропку адліку не вельмі карэктна.

І зусім ужо сумнеўнай выглядае заява, што самай устойлівай валютай у нашай краіне з'яўляюцца беларускія рублі. 13 лістапада 2007 года 1 еўра па курсе Нацбанку каштуе 3.139 беларускіх рублёў. А 13 лістапада 2006 года курс быў зусім іншым: 1 еўра – 2.760 рублёў.

Такім чынам, за год беларускі рубель па дачыненні да еўра абясцэніўся амаль на 14%! Ці наўрад старшыня Нацыянальнага банка не ў курсе гэтай тэндэнцыі. Тым не менш ён працягвае пераконваць усіх у стабільнасці беларускага рубля.

Добра, пакінем у супакою еўра. Паглядзім, як паводзіць сябе рубель па дачыненні да іншых валют.

Нацыянальны банк штодня публікуе курс рубля па дачыненні да шэрагу валют: ад ангельскага фунта стэрлінгаў да кыргызскага сома. Вось, давайце, з сома і пачнём. Добра, што дзяржаўнае тэлебачанне шмат нам распавядала пра рэвалюцыйныя жахі, якія робяцца ў Кыргызстане.

Год таму за 1 сом Нацбанк даваў 54,90 беларускіх рублі. А сёння – ужо 61,61! Такім чынам, рубель патаннеў па дачыненні да кыргызскай грашовай адзінкі на 12,2%.

Малдова перажывае далёка не лепшы час праз расейскую блакаду. Але 13 лістапада 2006 года 1 лей каштаваў 162,81 беларускіх рубля, а сёння – 191,51. Па дачыненні да лея наша валюта за год патаннела на 17,9%!

Не буду стамляць вас далейшым пералікам. З 26 валют, катыроўкі якіх публікуе Нацбанк, беларускі рубель апошнім годам патаннеў па дачыненні да ўсіх 26! Упэўніцеся самі.

Афіцыйныя курсы замежных валют Нацыянальнага банка Рэспублікі Беларусь

(злева: на 13.11.2006, справа: на 13.11.2007)

Рэкордным апынулася падзенне беларускага рубля па дачыненні да чэшскай кроны (20,6 і польскага злотага 20). Пра якую стабільнасць нацыянальнай валюты ў такой сітуацыі можна казаць?

Зрэшты, ёсць выхад. Трэба ўключыць у спіс валюты, курсы на якую усталёўвае Нацбанк, зімбабвійскі даляр. Тады, з улікам тамашняй інфляцыі, у Пятра Пракаповіча з'явяцца падставы казаць не толькі пра стабільнасць, але і ўмацаванне беларускага рубля на міжнароднай арэне.

Аляксандр Старыкевіч, «Салідарнасьць»