АМАП разагнаў акцыю салідарнасці з Андрэем Кімам ля Цэнтральнага суду (Фота, відэа)
18- 1.04.2008, 15:40
Супрацоўнікі АМАПа выцеснілі людзей ад будынка Цэнтральнага суду ў Менску, дзе праходзіць працэс над палітвязнем Андрэем Кімам.
Актывісты моладзевых арганізацый, а таксама простыя грамадзяне прыйшлі сёння да будынка суду, каб выказаць падтрымку актывісту. Яны стаялі на вуліцы з партрэтамі палітвязняў і скандавалі «Свабоду Кіму!»
Людзей акружылі блізу 10-15 амапаўцаў, якія выцеснілі людзей ад будынка суду ў бок стадыёна «Дынама». Пры гэтым яны паводзілі сябе вельмі груба і штурхалі людзей.
Працэс па справе моладзевага актывіста Андрэя Кіма пачаўся 1 красавіка, у 14.00 у судзе Цэнтральнага раёна Менска.
Палітвязень Андрэй Кім быў затрыманы падчас акцыі прадпрымальнікаў 21 студзеня ў сталіцы і арыштаваны на 10 сутак. Пасля адбыцця пакарання ён змешчаны ў СІЗА на вуліцы Валадарскага ў Менску.
У дачыненні актывіста высунутае абвінавачванне па арт. 364 Крымінальнага кодэкса (гвалт альбо пагроза ўжывання гвалту ў дачыненні працаўніка міліцыі з мэтай перашкодзіць яго законнай дзейнасці).
У следчым ізалятары Андрэй Кім правёў больш як два месяцы.