Бізнэсоўца выпусцілі з СІЗА за 700 тысяч даляраў

Расследванне крымінальнай справы ў дачыненні да экстрадаванага з Нямеччыны экс- дырэктара па маркетынгу прадпрыемства "Домус" Юрыя Шатра скончанае.

Аб гэтым паведамілі агенцтву "Інтэрфакс-Захад" у сераду ў міністэрстве ўнутраных справаў Беларусі.

"Расследванне дадзенай справы скончанае. Ідзе падрыхтоўка да перадачы матэрыялаў расследвання ў Генеральную пракуратуру Беларусі", - паведамілі ў МУС.

Там удакладнілі, што Ю.Шацёр пераведзены з СІЗА пад хатні арышт.

Па словах суразмоўцаў агенцтва, Ю. Шацёр вярнуў дзяржаве частку доўгу ў памеры больш за Br1,5 млрд. (704 000 даляраў ЗША).

Як раней паведамляла агенцтва з спасылкай на Генеральную пракуратуру, Ю.Шацёр, якому было прад'яўлена абвінавачванне ў стварэнні злачыннай арганізацыі з мэтай ухілення ад мытных плацяжоў у адмыслова буйным памеры, быў у канцы 2007 году затрыманым у Нямеччыне і экстрадаваным ў Беларусь.