Міністр ухваляе падвышэнне коштаў на мабільную сувязь
11- 28.01.2009, 12:24
Міністр сувязі Беларусі Мікалай Панцялей заявіў, што падвышэнне тарыфаў сотавых аператараў «было вымушанай мерай і з'яўляецца апраўданым».
«Тарыфы за мінулы год выраслі па Беларусі ўсяго на 0,1%. Тым часам, вы ведаеце лічбы па інфляцыі ў Беларусі, якія не былі звязаныя з дэвальвацыяй беларускага рубля. У 2007 годзе тарыфы і зусім упалі», — цытуе чыноўніка Onliner.by.
На думку Мікалая Панцялея, на сённяшні дзень аператары папросту вымушаныя падвысіць кошты, каб забяспечыць хоць бы пакрыццё выдаткаў на эксплуатацыю сетак, падвышэнне зарплатаў.
«Падвышэнне было вымушанай мерай, я лічу», — дадаў міністр.
Нагадаем, ТАА «Мабільныя Тэлесістэмы» (МТС) абвесціла аб падвышэнні з 9 лютага 2009 года тарыфаў на ўнутрысеткавыя і пераадрасаваныя выклікі. Таксама падвышаюцца кошты на выходныя SMS, паслугі інтэрнэту.
Аб падвышэнні тарыфаў з 15 лютага таксама абвесціла мабільная кампанія Velcom.
Падвышэнне коштаў на 18% закране ўсе тарыфныя планы velcom і ПРЫВІТАННЕ, а таксама адаб'ецца на кошце дадатковых і спецыяльных паслугаў. Кампанія Velcom паведамляе аб павелічэнні роўмінгавых тарыфаў на выходныя выклікі і SMS у сетках замежных аператараў-партнёраў па роўмінгу з 1 лютага 2009 года.
