Вярхоўны суд адхіліў іск заснавальнікаў Беларускай партыі працоўных

Суд адмовіўся разглядаць іск заснавальнікаў Беларускай партыі працоўных (БПП) да Мінюста, які прыпыніў працэс рэгістрацыі арганізацыі.

«Сваю адмову Вярхоўны суд матывуе тым, што ў адпаведнасці з законам аб палітычных партыях рашэнне пра адтэрміноўку рэгістрацыі ў судзе не разглядаецца», — паведаміў БелаПАН старшыня аргкамітэта па стварэнні БПП Аляксандр Бухвостаў.

Нагадем, 8 верасня Мінюст вынес рашэнне аб адтэрміноўцы рэгістрацыі Беларускай партыі працоўных, запатрабаваўшы шэраг дадатковых дакументаў да 21 верасня. Заснавальнікі БПП палічылі патрабаванне Мінюста незаконным і адмовіліся прадстаўляць гэтыя дакументы.

Бухвостаў не выключае, што бліжэйшым часам Мінюст можа адмовіць у рэгістрацыі партыі. «На заснавальнікаў партыі аказваецца ціск. Мінюст дзейнічае сваім звычайным спосабам, з дапамогай мясцовых адміністрацый і аддзелаў унутраных спраў правяраючы абставіны правядзення ўстаноўчага з’езда. Гэтыя праверкі носяць форму псіхалагічнага ціску з патрабаваннем адмовіцца ад удзелу ў стварэнні партыі», — сказаў Бухвостаў.

Палітык паведаміў, што ў выпадку адмовы ў рэгістрацыі рашэнне Мінюста будзе абскардажана ў Вярхоўным судзе.

«Мы працягваем лічыць, што паданы намі ў Мінюст пакет дакументаў дастатковы для рэгістрацыі партыі. У судзе ж мы прадставім усе неабходныя дакументы, якія пакажуць, што сходы па вылучэнні дэлегатаў на ўстаноўчы з’езд праводзіліся ў поўнай адпаведнасці з рашэннем аргкамітэта», — паведаміў Бухвостаў.