Міністра абароны Беларусі прыняў Кадафі
8- 22.12.2009, 9:05
З афіцыйным візітам у Трыпалі знаходзіцца беларуская ваенная дэлегацыя пад кіраўніцтвам міністра абароны Юрыя Жадобіна.
16 снежня Беларусь і Лівія падпісалі пратакол аб супрацоўніцтве ў галіне абароны.
Паводле інфармацыі прэс-службы Міністэрства абароны Беларусі, візіт адбыўся 14—16 снежня.
У Трыпалі прайшлі перамовы Юрыя Жадобіна з сакратаром часовага камітэта абароны (міністрам абароны) Лівіі Абу Бакрам Юнісам Джаберам.
Міністра абароны Беларусі прыняў лівійскі лідэр Муамар Кадафі.
Нагадаем, што Муамар Кадафі наведваў Менск у лістападзе 2008 года.
Муамар Кадафі стаў лідэрам Лівіі ў 1969 годзе і ўсталяваў рэжым, аснову якога склалі народныя камітэты і сходы, у сакавіку 1977 абвясціў «дзяржаву масаў» (джамахірыю).
Ён забараніў усе палітычныя арганізацыі, акрамя ўласнага Арабскага сацыялістычнага саюза. У знешняй палітыцы рэжым Кадафі ў мінулым аказваў падтрымку тэрарыстычным арганізацыям, асабліва панісламісцкага кшталту.
