Расейскія алігархі зацікавіліся Браслаўскімі азёрамі

Бізнэсмэны разглядаюць магчымасці рэалізацыі інвестыцыйных праектаў на тэрыторыі Нацыянальнага парка «Браслаўскія азёры».

Пра гэта БелТА паведаміў выканаўца абавязкаў генеральнага дырэктара нацпарка Андрэй Кудзін.

«Цікавасць інвестары выяўляюць, - адзначыў ён. - Увесь час тут бываюць расейскія алігархі, замежныя бізнэсмэны. Але іх цікавяць канкрэтныя бізнэс-праекты і гарантыі вяртання інвестыцыяў». Пры гэтым Андрэй Кудзін патлумачыў, што гаворка ідзе аб дзяржаўных гарантыях.

Замежных інвестараў прыцягваюць розныя праекты. У першую чаргу разглядаюцца магчымасці ўкладання інвестыцыяў у развіццё турыстычнага комплексу нацпарка, перш за ўсё ў будаўніцтва базаў адпачынку. У другую чаргу бізнэсмэнаў цікавіць паляўнічы турызм. «Сёння гэта найбольш дынамічны сегмент. У прыватнасці, даволі папулярным яго накірункам з'яўляецца будаўніцтва вальераў - вельмі развітая і папулярная ў Еўропе мадэль кіравання папуляцыямі дзікіх жывёлаў», - дадаў Андрэй Кудзін.

Нацыянальны парк «Браслаўскія азёры» размешчаны на паўночным захадзе Беларусі. Яго агульная плошча складае 69,1 тыс.га. Прыгажосць і эстэтычную каштоўнасць краю надаюць яго азёры. З іх найбольшыя па плошчы - Дрывяты, Снуды, Струста, Войса, Нядрова, Неспіш. Нацыянальны парк насяляюць такія рэдкія віды птушак, як чорны бусел, шэры журавель, серабрыстая чайка, белая курапатка, чорнаваллёвік, уральская няясыць. Раслінны свет нацпарка ўключае каля 500 розных відаў раслінаў, 32 з якіх занесеныя ў Чырвоную кнігу Беларусі.