Узброеныя сілы кінутыя на ўборачную

Вайскоўцы транспартных войскаў Беларусі дапамогуць сельскай гаспадарцы ва ўборцы збожжавых.

Пра гэта паведаміў начальнік дэпартамента транспартнага забеспячэння Міністэрства абароны Беларусі генерал-маёр Віталь Кірэеў сёння на брыфінгу, перадае БелТА.

Як заявіў Кірэяў, для дапамогі працаўнікам сяла ў дэпартаменце транспартнага забеспячэння створаны зводны ўзвод, які будзе працаваць на палях Магілёўскай вобласці.

Вайскоўцы прыбудуць у гаспадаркі са сваёй тэхнікай і ў асноўным будуць занятыя на транспартоўцы збожжа з палёў да месцаў яго захоўвання і перапрацоўкі.

Вайскоўцам таксама акажуць дапамогу працаўнікі ідэалогіі і ансамблі масавай самадзейнасці, якія будуць спяваць, танчыць і падбадзёрваць працаўнікоў сяла ідэалагічнай загартоўкай.

Так з мэтай «аператыўнага інфармавання працаўнікоў гаспадарак аб ходзе пасяўных працаў» будуць выпускацца інфармацыйныя брашуры «Баявы лісток», «Маланка», «Дзённік уборкі» і прапагандавацца перадавы досвед.

У раённых цэнтрах, на цэнтральных сядзібах сельгазарганізацыяў арганізаванае штодзённае ўзняццё сцяга працоўнай славы і вывешванне імянных аншлагаў у гонар перадавікоў. Акрамя таго, перад удзельнікамі жніва непасрэдна на палях, палявых станах і мехдварах выступяць мабільныя калектывы мастацкай самадзейнасці і канцэртныя брыгады.