Кадафі забараніў еўрапейцам уязджаць у Лівію
4- 15.02.2010, 16:03
Лівія часова спыніла выдачу ўязных віз усім грамадзянам краін Еўразвяза. Абмежаванні не закранулі толькі адну з 27 дзяржаў - Вялікабрытанію.
Пра гэта 15 лютага паведамляе Корреспондент.net са спасылкай на Reuters. Агенцтва пры гэтым спасылаецца на неназванага прадстаўніка галоўнага аэрапорта краіны ў Трыпалі.
«Усё правільна. Было прынята такое рашэнне. Візы не выдаюцца ўсім еўрапейцам, акрамя брытанцаў», - заявіў ён.
Пры гэтым суразмоўца не назваў прычыны такога рашэння лівійскіх уладаў. Пакуль гэтую інфармацыю не пацвердзіў ні афіцыйны Трыпалі, ні прадстаўнікі Еўразвяза.
Напярэдадні лівійская газета «Oea» паведамляла, што доступ у краіну будзе закрыты для жыхароў краін шэнгенскай дамовы, уключаючы Швейцарыю, якая не ўваходзіць у Еўразвяз.
Верагодна, прычынай такога кроку можа быць нядаўняе рашэнне швейцарскіх улад, якія абвясцілі персонай нон-грата кіраўніка лівійскай рэвалюцыі Муамара Кадафі, членаў яго сям'і і 188 іншых лівійскіх дзеячаў высокага рангу.
У лістападзе 2009 года Трыпалі ўжо пратэставаў супраць абмежаванняў на выдачу грамадзянам краіны шэнгенскіх віз.
Крызіс у адносінах паміж Лівіяй і Швейцарыяй узнік у ліпені 2008 года, калі ў Жэневе за дэбош у гатэлі быў затрыманы Ганібал Кадафі, сын Муамара Кадафі.
Тады швейцарская паліцыя арыштавала яго з цяжарнай жонкай за збіццё служачых гатэля.
Пасля гэтага Лівія абвінаваціла Швейцарыю ў парушэнні 27 пунктаў закона, дапушчаных падчас гэтага затрымання. МЗС Лівіі заявіў, што паліцэйскія выламалі дзверы, наставілі на Ганібала Кадафі зброю і адвялі яго пад канвоем з 20 чалавек.
А сам Кадафі падаў у суд на швейцарскі кантон Жэнева і газету Tribune de Genève, якая размясціла фотаздымкі буяна, зробленыя ў аддзяленні паліцыі.
У кастрычніку 2008 года дзяржаўная нафтавая кампанія Лівіі абвясціла аб спыненні паставак нафты ў Швейцарыю. Пазней Трыпалі забараніў самалётам швейцарскай авіякампаніі Swiss International Air Lines прызямляцца на тэрыторыі краіны.
У жніўні 2009 года прэзідэнт Швейцарыі Ханс Рудольф Мерц папрасіў прабачэння перад лівійскім урадам, і паміж Швейцарыяй і Лівіяй было падпісана пагадненне аб нармалізацыі адносінаў. Аднак у лістападзе 2009 года Берн прыпыніў яго дзеянне.
