Падчас забегу на 100 метраў у Менскай вобласці памёр салдат-тэрміновік
16- 28.04.2010, 10:36
Радавы быў прызваны на службу ва ўзброеныя сілы Беларусі ў студзені 2010 года і памёр падчас спартова-масавых мерапрыемстваў.
Як паведамляе «Радыё Рацыя», спартова-масавыя мерапрыемствы праводзіліся ў вайсковай частцы 25 красавіка.
Вайсковец чатыры месяцы таму быў прызваны Старадарожскім раённым ваенным камісарыятам і праходзіў службу ў 307-й асобнай чыгуначнай брыгадзе, якая базуецца ў Слуцку (Менская вобласць).
Падчас забегу на кароткія дыстанцыі - стометроўкі - радавы адчуў сябе дрэнна і страціў прытомнасць. Ваенныя медыкі, якія прыбылі на месца здарэння, канстатавалі смерць салдата.
На сённяшні дзень па факце гібелі радавога прызначаная судова-медыцынская экспертыза.
Слуцкая міжраённая ваенная пракуратура праводзіць праверку, падчас якой асаблівая ўвага надаецца аналізу працы медыцынскай камісіі Старадарожскага РВК, якую праходзіў навабранец перад адпраўкай у армію.