Рашэнне аб закрыцці «Аўтарадыё» засталося ў сіле

Вышэйшы гаспадарчы суд Беларусі 29 сакавіка пакінуў у сіле рашэнне Рэспубліканскай камісіі па тэлебачанні і радыёвяшчанні аб спыненні вяшчання «Аўтарадыё».

Такім чынам, суддзя Дзмітрый Аляксандраў не задаволіў пазоў радыёстанцыі да камісіі, адмяніўшы ранейшае рашэнне ВГС, перадае БелаПАН.

Галоўны рэдактар ​​«Аўтарадыё» Юрый Базан заявіў, што абскардзіць гэтае рашэнне ў касацыйнай інстанцыі.

Нагадаем, 28 сакавіка ВГС не задаволіў яшчэ адзін пазоў ЗАТ «Аўтарадыё» - да Міністэрства інфармацыі, з патрабаваннем адмяніць вынесенае FM-станцыі папярэджанне.

Касацыйная калегія Вышэйшага гаспадарчага суду 17 сакавіка адмяніла рашэнне ВГС па пазовах «Аўтарадыё» да Міністэрства інфармацыі і Рэспубліканскай камісіі па тэлебачанні і радыёвяшчанні аб спыненні вяшчання радыёстанцыі і накіравала справу на паўторны разгляд.

9 сакавіка ВГС прызнаў несапраўднымі папярэджанне Міністэрства інфармацыі, вынесенае ЗАТ «Аўтарадыё», а таксама рашэнне Рэспубліканскай камісіі па тэлебачанні і радыёвяшчанні аб спыненні вяшчання радыёстанцыі.

Папярэджанне было вынесенае Мінінфармам 10 студзеня і стала адной з падставаў для спынення вяшчання радыёстанцыі 12 студзеня па рашэнні камісіі. Паводле афіцыйнай фармулёўкі, прычынай папярэджання і спынення вяшчання «Аўтарадыё» стала распаўсюджванне ў эфіры радыёстанцыі інфармацыі, якая «змяшчае публічныя заклікі да экстрэмісцкай дзейнасці». Менавіта так чыноўнікі расцанілі словы кандыдата ў прэзідэнты на выбарах-2010 Андрэя Саннікава ў рэкламным роліку аб тым, што «лёс краіны вырашаецца не на кухні, а на плошчы».