Плошча пасля разгону 19 снежня: ні рыдлёвак, ні бутэлек (Фота)

29.04.2011, 17:29

У судзе над Андрэем Саннікавым прадэманстравалі фотаздымкі, якія былі зробленыя адразу пасля разгону акцыі на Плошчы.

29 красавіка, у трэці дзень суду над кандыдатам у прэзідэнты Андрэем Саннікавым, са сведкавымі паказаннямі выступаў Пётр Кучко. Сведка Кучко заявіў, што быў на акцыі 19 снежня - прыйшоў, каб пачуць выступленні кандыдатаў. Акцыя насіла мірны характар. Пра акцыю ён даведаўся з сустрэч з апазіцыйнымі кандыдатамі. Пайшоў адзін. Быў на Кастрычніцкай плошчы ў 19 гадзін, перадае Радыё Свабода.

«Апазіцыйныя кандыдаты прыйшлі каля 20 гадзін. Мітынгоўцам не хапала месца на Плошчы, мітынгоўцам замінала музыка, каток», - кажа сведка.

Калі людзі выйшлі на праспект Незалежнасці, ім ніхто не перашкаджаў. Падчас шэсця панавала атмасфера натхнення і энтузіязму.

Кучко заявіў, што ён заставаўся на плошчы Незалежнасці пасля разгону дэманстрацыі. На яго, пажылога чалавека, спецназаўцы не звярнулі ўвагі. Ён заявіў, што на Плошчы пасля разгону не было ніякіх бутэлек, ледасекаў, каністраў і ўсяго іншага, што потым паказала БТ у фільме «Жалезам па шкле». Сведка назваў гэты фільм фальшыўкай і заявіў, што ў той вечар пасля разгону зрабіў мабільным тэлефонам 5 здымкаў плошчы, на якіх зафіксаваныя калоны міліцыянтаў, машына і не відаць ніякіх прадметаў, якія паказала БТ і аб якіх гаворыцца ў матэрыялах справы.

Кучко папрасіў далучыць гэтыя здымкі да справы. Абвінаваўца выступіў супраць. Адвакаты падтрымалі Кучко.

Кучко сказаў, што гатовы аддаць фотаапарат на экспертызу. Суддзя здзівілася, як міліцыянты не арыштавалі сведку ў ноч на 20-е снежня.

Кучко патлумачыў «Свабодзе», што ў тую ноч яго не затрымалі, таму што, відаць, прынялі за свайго. Ён мог вольна назіраць пляцоўку пасля разгону, дзе не было зусім ніякіх прадметаў.

Пазней у фільме «Жалезам па шкле» паказалі, што на гэтай плошчы знаходзіліся нібыта розныя рыдлёўкі, бутэлькі, жалезныя дубінкі, каністры з запальнай сумессю. Кучко гэта абурыла, і таму ён вырашыў гэта абвергнуць ў судзе.

Суддзя адмовіла ў хадайніцтве далучыць да справы фотаздымкі, бо на іх няма часу.

Адвакаты настойваюць на тым, што патрэбнае выманне фотаапарата для вывучэння, калі былі створаныя файлы.