Гамяльчаніна затрымалі за значак «Куплю нестабільную валюту»

У аддзяленні «Банка Масква-Мінск» у Гомелі 13 мая міліцыя затрымала актывіста АГП і Руху «За Свабоду» Уладзіміра Няпомняшчых.

Апазіцыянер быў дастаўлены ў Цэнтральнае РАУС Гомеля.

«Я быў у футболцы з надпісамі «За Беларусь без Лукашэнкі» і «Хопіць, дастаў», таксама на мне быў значак «Куплю нестабільную валюту». Гэта і прыцягнула ўвагу міліцыянтаў. Праўда, яны заявілі мне, што ім паступіла тэлефанаванне з банка са скаргай на мяне. У міліцыі з мяне ўзялі тлумачэнні з нагоды таго, што я рабіў у банку. Я патлумачыў, што хацеў набыць нестабільную валюту, каб вярнуць дзяржаве нашую, стабільную», - паведаміў БелаПАН Няпомняшчых.

На дадзены момант яго адпусцілі з аддзела міліцыі, і актывіст накіраваўся ў банк, каб высветліць, хто і па якой прычыне тэлефанаваў у міліцыю і скардзіўся на яго.

Няпомняшчых не першы раз затрымлівае міліцыя за надпісы на футболках «крамольнага» зместу. Міліцыя абмяжоўвалася тлумачэннямі актывіста і не прыцягвала яго да якой-небудзь адказнасці.