Куляшоў: «Працаваць» на акцыях у цывільным загадаў я

Міністр унутраных справаў Беларусі заяўляе, што яму «можна ўсё».

«Назавіце мне, калі ласка, хоць адзін нарматыўна-прававы акт, які мне як міністру ўнутраных справаў забараняў б вызначыць для супрацоўніка міліцыі парадак нашэння формы адзення. Тады я скажу: мае рацыю супрацоўнік міліцыі ці не мае рацыю, - заявіў кіраўнік МУС Анатоль Куляшоў, адказваючы на ​​пытанні «Комсомольской правды в Беларуси» падчас прамой тэлефоннай лініі з чытачамі газеты «Рэспубліка».

«Я думаю, вы не назавеце ніводнага нарматыўна-прававога акта. Ёсць такі ва ўзброеных сілах. І тое статут дае права камандзіру з улікам умоваў надвор'я, з улікам выканання той ці іншай задачы вызначаць форму адзення. Міністр унутраных спраў вызначае форму адзення, з улікам акалічнасцяў справы, для кожнай выкананай задачы, - працягнуў міністр.

На пытанне, ці было афіцыйнае распараджэнне працаваць супрацоўнікам МУС у цывільным на акцыях па серадах, Куляшоў адказаў: «Маё распараджэнне. Асабіста маё».

Ён таксама прызнаў, што скандальныя папраўкі ў закон «Аб масавых мерапрыемствах», якія прыраўноўваюць да акцый пратэсту арганізаваную праз сацыяльныя сеткі бяздзейнасць, былі ініцыяваныя МУС.

«Мяне як міністра ўнутраных справаў хвалюе адно: парушэнне спакою, грамадскага парадку ў краіне. Для мяне гэта будзе рычаг, які дасць мне права і магчымасць выкарыстоўваць яго для таго, каб гэты парадак, гэты спакой большасці людзей у краіне парушаны не быў», - сказаў міністр.