Беларуская Моська гаўкае зноў

Намеснік міністра замежных спраў Беларусі Аляксандр Гур'янаў сумняецца, што плацежная сістэма ЗША можа заблакаваць даляравыя разлікі беларускіх прадпрыемстваў.

«Мы не схільныя думаць, што ЗША абмяжуюць даляравыя разлікі, звязаныя з экспартам-імпартам Беларусі, таму што гэта істотна падарве імідж даляра як сусветнай валюты. Гэта значыць - рыць самому сабе яму», - заявіў А. Гур'янаў у інтэрв'ю агенцтву «Інтэрфакс-Захад».

«Цяжка сказаць, як павядуць сябе нашы партнёры ў ЗША. Забяспечваючы асноўную сусветную рэзервную валюту, напэўна, лёгка маніпуляваць фінансавымі плынямі. Але трэба заўсёды памятаць і пра наступствы такіх рашэнняў. З аднаго пункту гледжання даляр - гэта нацыянальная валюта ЗША, з іншага - гэта валюта, якая выкарыстоўваецца ў міжнародных разліках, што забяспечвае яе эканамічна. Менавіта таму, прымаючы такія рашэнні, трэба разумець і ступень адказнасці», заявіў намеснік кіраўніка МЗС.