У Ізраілі пратэстуюць супраць дружбы Лібермана з Лукашэнкам

18 студзеня ў Тэль-Авіве пройдзе акцыя ў падтрымку беларускіх палітвязняў.

Яна адбудзецца каля амбасады нашай краіны па адрасе: Тэль-Авіў, вуліца Райнес, 3. Пачатак - у 11 гадзін па мясцовым часе. Пра гэта ў сваім акаўнце ў сацыяльнай сетцы «Фэйсбук» напісаў заснавальнік і рэдактар сайта belisrael.info Арон Шусцін.

«Шмат каму ў Ізраілі вядома, што Ліберман (былы міністр замежных спраў Ізраіля, абвінавачаны ў карупцыйных сувязях) ужо многія гады падтрымлівае добрыя, калі не сказаць сяброўскія, адносіны з беларускім дыктатарам. Больш за тое, ён, бывала, знікаў на некалькі дзён, а затым выяўлялася ў атачэнні Лукашэнкі. А потым распавядаў, які гэта добры кіраўнік сваёй краіны, ды і наш яўрэйскі сябар.

І гэта пры тым, што ў круг сапраўды самых блізкіх сяброў Лукашэнкі ўваходзяць Ахмадзінежад, Чавес, Кастра, Асад і ўжо спачылы Кадафі», - заявіў Арон Шусцін.

Ён таксама нагадаў, пра заявы, зробленыя амбасадарам Ізраіля ў Беларусі Іосіфам Шагалам у мінулым годзе.

«Той каля года назад, яшчэ не даехаўшы да Менска, у адным з інтэрв'ю дадумаўся да немагчымасці бессаромна расхвальваць Лукашэнку, які ўжо 19 гадоў мучыць свой народ. Больш за тое, гэты самы Шагал сказаў, што на месцы будзе сустракацца з амерыканскім і еўрапейскімі амбасадарамі і тлумачыць ім, у чым яны не правы ў адносінах да Лукашэнкі. Затым ужо ў Менску на сваёй першай прэс-канферэнцыі бессаромна заявіў, што не ведае ні пра якіх беларускіх палітвязняў».

Такія паводзіны Лібермана і Шагала Арон Шусцін называе «ганьбай для Ізраіля» і прапануе рушыць услед прыкладу іншых краін і падтрымаць вязняў беларускага рэжыму.