Арэндная кватэра: без вадаправода, але з пазыкамі па камуналцы

Вось ужо некалькі месяцаў барысаўчанін Аляксей Пракудовіч спрабуе знайсці праўду ў мясцовым выканкаме.

Прачытаўшы аб тым, што мясцовы орган улады прадастаўляе ў арэнду камерцыйнае жыллё, ён узрадаваўся: з'явілася рэальная магчымасць мець недарагі дах над галавой, пішуць «Борисовские новости».

«Я звярнуўся ў выканкам, - успамінае Аляксей Пракудовіч. - Затрымак з прадастаўленнем пустога жылля не было. У адпаведнасці з рашэннем выканкама ад 27 ліпеня №953 бягучага года, прадстаўнікі УП «Жыллё» заключылі са мной тыпавую дамову найму жылога памяшкання камерцыйнага выкарыстання дзяржжылфондам. Мне выдзелілі кватэру ў доме па вул. Камсамольскай, 67 тэрмінам на тры гады. Мы з жонкай заплюшчылі вочы на пячное ацяпленне, адсутнасць водазабеспячэння і туалет на вуліцы».

На жаль, радасці наваселля сям'і Пракудовічаў так і не давялося адчуць. Жыллё мае вельмі жаласны выгляд: струхлелыя шпалеры на сценах, столь з аблупленай тынкоўкай, а ў кутах пакоя нейкая старызна і гнілыя анучы... Увогуле, няўзброеным вокам было відаць, што дзесятак гадоў у пакоі не было рамонту. А ў Пастанове Саўміна РБ ад 27.12.2011 № 1739 ясна сказана, што жыллё, якое здаецца ў арэнду, павінна быць абавязкова адрамантавана.

«У дамове найму сказана, што ў кватэры павінна быць газавая пліта з балонам, новыя шпалеры, фарбаваныя падлогі, замененыя дзверы. Нічога гэтага няма. Я гатовы выдаткаваць свае грошы, але мне патрэбныя гарантыі, што праз тры гады мяне адсюль не выселяць», - кажа ён.

Паводле дамовы найму, пры ўсяленні ў кватэру наймальніка павінен быць аформлены акт прыёму-перадачы. Такі дакумент на кватэру па вуліцы Камсамольскай, 67 да гэтага часу адсутнічае. Зразумела, што Аляксей Пракудовіч паспрабаваў яго запатрабаваць .

«Я разважаю так: на рамонт гэтай кватэры павінны былі выдзеліць сродкі, але іх хтосьці прысвоіў. І зараз, калі будзе складзены акт кампетэнтнай камісіяй, гэта дазволіць выкрыць злодзея. Вось ў чыноўнікаў і няма жадання распісвацца ва ўласнай неахайнасці, - сцвярджае ён. - Я лічу, што большасць чыноўнікаў толькі робяць выгляд, што займаюцца рашэннем дзяржаўных пытанняў, і пры гэтым атрымліваюць вялікія аклады. Дзяржслужачыя прыходзяць на працу і нічога не робяць».

Няўдалы наймальнік звярнуўся ў ЖЭУ-4, каб аформіць акт прыёму-перадачы жылля. У лісце на імя начальніка Пятра Аніскевіча ён канкрэтна апісаў сітуацыю і нагадаў пра абставіны афармлення арэнды жылля.

Адказ з ЖЭУ ашаламіў Аляксея: «Вышэйназваная кватэра вылучалася Вам аддзелам ЖКГ Барысаўскага райвыканкама на пэўных умовах з Вашай згоды. Вамі была дадзеная згода ўсяліцца ў вышэйпаказаную кватэру ў такім стане, у якім яна знаходзіцца ў цяперашні час, і зрабіць у ёй рамонт за свае сродкі».

«Але кватэру абавязаныя былі адрамантаваць за бюджэтныя сродкі» - катэгарычна заяўляе Аляксей Пракудовіч.

У рэшце рэшт у ЖЭУ-4 Аляксею ўсё ж выдалі акт, праўда, іншы - дэфектны, датаваны 17 студзеня 2013 года, дзе ўтрымліваюцца звесткі аб тым, колькі будматэрыялаў спатрэбіцца для прывядзення кватэры ў божы выгляд. Дарэчы, з гэтым актам гісторыя наогул крымінальная. Яго нібыта падпісаў майстар ЖЭУ-4 Уладзімір Арцямчук, хоць на самой справе гэты чалавек уладкаваўся на працу ў ЖЭУ толькі праз паўтара месяца пасля складання акта! Акрамя таго, гэты дакумент мае шмат фактаў некампетэнтнасці, якую ні адзін талковы будаўнік не можа дапусціць.

Зварот да гендырэктара УП «Жыллё» Аляксея Вялага стаў апошняй кропляй, якая перапоўніла чашу цярпення сям'і Пракудовічаў.

«Запісаўся на прыём да Вялага, - распавядае Аляксей, - але замест гендырэктара мяне прыняў яго намеснік. Ён выслухаў мяне, а затым папрасіў выкласці ўсё ў пісьмовым выглядзе. Паўстае пытанне: навошта я яму цэлую гадзіну распавядаў аб сваёй сітуацыі?»

Цяпер сям'я Пракудовічаў вымушаная здымаць жылплошчу ў прыватнай асобы, выплачваючы адначасова і арэндную плату за выканкамаўскі «палац».

Яны звярнуліся ў пракуратуру Барысаўскага раёна з просьбай даць прававую ацэнку дзеянням уладаў. Заява была прынятая да вытворчасці, і хочацца верыць, што сітуацыя ўсё ж будзе вырашаная на карысць наймальнікаў жылля камунальнай уласнасці.