Еўразвяз узмацняе кантроль на межах

Кантроль на знешніх межах Еўрапейскага Звяза будзе ўзмоцнены.

Рашэнне пра гэта прыняў Еўрапарламент, зацвердзіўшы стварэнне новай сістэмы абмену інфармацыяй Eurosur, паведамляе Deutsche Welle.

На фоне нядаўняй катастрофы блізу італьянскага вострава Лампедуза Еўрапейскі Звяз прымае меры па ўзмацненні кантролю на знешніх межах. На пасяджэнні, якое адбылося ў Страсбургу, Еўрапарламент зацвердзіў рашэнне аб стварэнні сістэмы абмену інфармацыяй з тым, каб прадухіліць нелегальную міграцыю і спыніць дзейнасць банд, якія займаюцца кантрабанднай транспарціроўкай людзей праз межы. Сістэма, названая Eurosur, таксама закліканая спрыяць прадухіленню гібелі мігрантаў у адкрытым моры.

Новая сістэма павінна быць уведзеная ў эксплуатацыю ў снежні гэтага года спачатку ў дзяржавах Еўразвяза, якія маюць знешнія межы, а затым і ў іншых краінах ЕЗ, адзначае агенцтва epd. Паводле дадзеных Еўрапарламента, у 2012 годзе знешнія межы ЕЗ нелегальна перасяклі больш за 72 тысячы чалавек - у два разы больш, чым у папярэднім годзе. Камісар ЕЗ па ўнутраных справах Сесілія Мальмстрэм падкрэсліла, што сістэма Eurosur павінна адыграць важную ролю, дазваляючы своечасова выяўляць суды з мігрантамі на борце, якія церпяць бедства, і прыходзіць ім на дапамогу.