Мазырскіх нафтавікоў пераводзяць на двухдзёнку

Катастрафічная сітуацыя на прадпрыемствах нафтавай галіны.

Пра гэта сайту charter97.org распавёў супрацоўнік «Мазырскай нафтавыведачнай экспедыцыі глыбокага бурэння» РУП «Белгеалогія».

«Сітуацыя катастрафічная. Рабочым плацяць капейкі, у выніку чаго многія пачалі звальняцца. Зарплата рабочых і ніжэйшага звяна інжынерна-тэхнічных работнікаў складае ад 3 да 3 з паловай мільёнаў рублёў. Затое ў кіраўніцтва яна вагаецца ад 10 да 25 мільёнаў», - піша ён.

Супрацоўнік прадпрыемства паведаміў, што ў наступным месяцы ён і яго калегі будуць працаваць толькі два дні ў тыдзень. Ён не выключае, што па гэтай прычыне зарплата абрынецца яшчэ ніжэй.

«З 18 лістапада 2013 года нас пераводзяць на два рабочых дні (16 гадзін) ў тыдзень. Пытанне: якую зарплату мы атрымаем і як на яе жыць? Мы хочам зарабляць, а не атрымоўваць, а працы няма. Вядома, кіраўніцтву ўсё «да лямпачкі». Атрымлівалі 13 мільёнаў, а атрымаюць 8. А што рабіць нам, калі атрымлівалі 3,5 мільёна, а атрымаем 1,6. Як жыць? У іх адказ адзін - звальняйцеся», - кажа рабочы.

Сайт charter97.org патэлефанаваў у прыёмную прадпрыемства «Мазырская нафтавыведачная экспедыцыя глыбокага бурэння». Супрацоўніца арганізацыі перад тым, як адказаць, на працягу дзвюх хвілін раілася з начальствам.

«Вы ведаеце, гэта ўсё чуткі. Магчыма, такое і адбудзецца ў выпадку, калі будзе неспрыяльная фінансавая сітуацыя. Але пакуль гэта ўсё - чуткі», - сказала яна. Паведаміць пра памер зарплаты на прадпрыемстве ў прыёмнай адмовіліся.