Міліцыя шукае самагоншчыкаў з дапамогай беспілотнікаў (Відэа)

Пры дапамозе беспілотніка супрацоўнікі міліцыі і МНС Менскай вобласці за суткі выявілі на Валожыншчыне 5 самагонных апаратаў.

У панядзелак 7 кастрычніка супрацоўнікі УУС Менаблвыканкама і Менскага абласнога ўпраўлення МНС упершыню выкарысталі беспілотны лятальны апарат «Бусел-М» для выяўлення схаваных у лясах падпольных самагонных вытворчасцяў. Маніторынг праводзіўся ў Валожынскім раёне, на тэрыторыі Налібоцкай пушчы. З вышыні птушынага палёту праводзілася відэаздымка мясцовасці з выкарыстаннем цеплавізара, пры гэтым малюнак перадаваўся на зямлю ў рэжыме рэальнага часу, паведамляе аддзяленне інфармацыі і грамадскіх сувязяў УУС Менаблвыканкама.

Самагонныя апараты, як правіла, старанна маскіруюцца ў гушчары лясоў. Схаваныя лістотай і замаскіраваныя, іх вельмі складана адшукаць не толькі з паветра, але і з зямлі. Аднак на экране цеплавізара нават нязначная крыніца цяпла на зямлі выглядае яркай жоўтай плямай. Дасведчанае вока аператара хутка вылучала сярод сілуэтаў жывёл крыніцы анамальнага цяпла.

Начальнік аддзялення ўпраўлення правапарадку і прафілактыкі УУС Менаблвыканкама Андрэй Амбражэй - ідэйны натхняльнік акцыі - падзяліўся падрабязнасцямі праведзенага мерапрыемства:

«У лясным масіве, паблізу вёсак Боркі, Дарагунь і Яцкава Валожынскага раёна намі былі заўважаныя 4 падазроныя крыніцы цеплавога выпраменьвання - ад яшчэ цёплых самагонных апаратаў і чанаў з суслам, а таксама характэрныя прыкметы саматужных самагонных вытворчасцяў - высечаныя дрэвы (на дровы для топкі катлоў апаратаў), пракладзеныя дарожкі, буйныя ёмістасці, дровы, навесы і г.д. Праведзены рэйд па канкрэтна пазначаных на мапе кропках пацвердзіў здагадкі - у лясах былі выяўленыя самагонныя вытворчасці. Як гэта прынята ў падобнай публікі, адходы самагонаварэння выліваліся імі прама на зямлю, а ўладальнікі аднаго з апаратаў, знойдзенага на беразе ракі Іслач, сістэматычна злівалі тысячы літраў адпрацаванай брагі прама ў раку. У апошнім выпадку працоўны аб'ём апарата склаў каля трох тон брагі, сам агрэгат складаўся з 9 металічных ёмістасцяў агульнай вагой у некалькі тон».

Нягледзячы на тое, што дабрацца да самагонных вытворчасцяў, схаваных у глыбіні лесу, справа не простая, у бліжэйшы час, пры дапамозе спецыяльнай тэхнікі, усе апараты будуць дэмантаваныя, вывезеныя і ўтылізаваныя.

Супрацоўнікамі Валожынскага РАУС прымаюцца меры для ўстанаўлення асоб, якія маюць дачыненне да вырабу самагонных апаратаў і самагонкі. Акрамя таго, інфармацыя будзе накіраваная кіраўніцтву Менаблвыканкама для прыняцця мер рэагавання да службовых асоб тэрытарыяльных органаў лясной гаспадаркі, якія не прынялі належных мер да выяўлення названых падпольных вытворчасцяў.