Міліцыя затрымала ў лесе музыкаў гурта Litesound

Увечары 12 сакавіка ў раёне Заслаўскага вадасховішча былі затрыманыя ўдзельнікі гурта Litesound браты Уладзімір і Дзмітрый Каракіны.

Як паведаміў бацька братоў і дырэктар групы Юры Каракін, музыкі шукалі ў лесе месца для здымак новага кліпа. Нечакана з'явіліся супрацоўнікі міліцыі і затрымалі артыстаў, піша БелаПАН.

«Дзве гадзіны іх пратрымалі ў аўтамабілі, прымусіўшы выключыць тэлефоны, а цяпер даставілі ў Ждановіцкі райаддзел міліцыі. Ніякага пратаколу не складалася», - сказаў Каракін-старэйшы.

Паводле ягоных слоў, пошук месца для здымак кліпа вёўся «недалёка ад рэзідэнцыі Лукашэнкі, але з іншага боку».

Група Litesound удзельнічала ў міжнародным конкурсе песні «Еўравізія-2012».