Кыргызскія апазіцыянеры захапілі будынак абласной адміністрацыі
12- 31.05.2013, 16:31
- 22,099
Некалькі сотняў чалавек уварваліся ў будынак дзяржаўнай адміністрацыі Джалал-Абадскай вобласці Кыргызстана.
Пра гэта паведамілі па тэлефоне яе супрацоўнікі. Па іх словах, асобы, якія захапілі будынак, прызначылі ад свайго імя новага губернатара, перадае ІТАР-ТАСС.
«Пры гэтым яны сцвярджаюць, што сваімі дзеяннямі падтрымліваюць удзельнікаў мітынгу ў Джэты-Агузскім раёне Ісык-Кульскай вобласці, якія настойваюць на нацыяналізацыі радовішча Кумтор», - распавялі супрацоўнікі адміністрацыі.
Падчас пранікнення мітынгоўцаў у галоўны адміністрацыйны будынак вобласці, праваахоўныя органы не аказалі супраціву.
«Мы не захапілі ўладу, а проста выгналі губернатара», - кажуць арганізатары нападу на будынак. Яны паведамілі, што на месца губернатара прызначылі Медэта Усенава, каардынатара апазіцыйнага руху «Эл уну», перадае партал akipress.org.
Масавыя беспарадкі
Беспарадкі ў Джэты-Агузскім раёне пачаліся тры дні таму, пасля таго, як некалькі сотняў жыхароў перакрылі аўтатрасу, якая вядзе на найбуйнейшае ў краіне залатаруднае радовішча «Кумтор». Удзельнікі акцыі запатрабавалі дэнансацыі пагаднення з канадскай кампаніяй «Цэнтэра голд», якая займаецца здабычай золата на рудніку. А таксама будаўніцтва ў гэтай мясцовасці за кошт інвестара бальніцы, захавання ім экалагічных нормаў і «сацыяльнага пакета» для мясцовага насельніцтва. У чацвер мітынгоўцы захапілі падстанцыю, якая забяспечвала «Кумтор» электрычнасцю. Мінулай ноччу супрацоўнікі міліцыі разагналі ўдзельнікаў мітынгу. Былі затрыманыя каля 100 чалавек.
Сёння ад 1,5 да 3 тыс жыхароў раёна заблакавалі паблізу вёскі Тамга некалькі сотняў супрацоўнікаў міліцыі, падпалілі іх аўтобус і пачалі закідваць камянямі.
Пратэстоўцы прад'явілі ўладам ультыматум: падача электраэнергіі будзе адноўленая, калі ўрад разарве пагадненне па найбуйнейшым прамысловым праекце ў краіне. Умяшаннем спецназа захопнікаў удалося вывесці з аб'екта і затрымаць, піша партал K-news.
Па словах аднаго з відавочцаў, прыкладна 10 мітынгоўцаў атрымалася падабраць у міліцыянтаў каскі, шчыты і дубінкі, якія тыя раскідалі падчас сутыкнення.
«Але агнястрэльнай зброі ў мітынгоўцаў я не бачыў. У асноўным, камяні і палкі», - заявіў адзін з удзельнікаў падзей.
Пратэстоўцы спрабавалі адбіць затрыманых. АМАП у адказ ужыў зброю.
У ходзе масавых беспарадкаў, якія адбыліся сёння ў Джэты-Агузскім раёне Ісык-Кульскай вобласці Кыргызстана, пацярпелі 55 чалавек, у тым ліку 13 супрацоўнікаў праваахоўных органаў. Пра гэта паведамілі ў міністэрстве аховы здароўя Кыргызстана.
Сярод пацярпелых няма асоб з агнястрэльнымі раненнямі. Загінулых таксама не зарэгістравана.
Надзвычайнае становішча
Па рашэнні прэзідэнта краіны Алмазбека Атамбаева, у сувязі са складанай аператыўнай абстаноўкай у Джэты-Агузскім раёне, на яго тэрыторыі да 10 чэрвеня ўведзены рэжым надзвычайнага становішча, паведамляе партал 24.kg.
«Увесці надзвычайнае становішча на тэрыторыі Джэты-Агузкага раёна Ісык-Кульскай вобласці з 15:00 гадзін 31 траўня 2013 года на перыяд да 10 чэрвеня 2013 года з устанаўленнем каменданцкай гадзіны з 21:00 да 06:00 гадзін», - гаворыцца ва ўказе прэзідэнта Алмазбека Атамбаева.