Змоўшчыку Бакіева не дапамог беларускі пашпарт

Суд прысудзіў набліжанага экс-прэзідэнта Кыргызстана Пайзулабека Рахманава да 12 гадоў турмы.

Такое рашэнне вынес 3 ліпеня Абдразак Барамбаеў, які старшынстваваў на працэсе, паведамляе 24kg.org.

Паводле яго слоў, суд лічыць, што віна Пайзулабека Рахманава даказаная ў незаконным пералічэнні 200 тысяч сомаў на рахунак марафону, такім чынам, у злоўжыванні службовым становішчам, а таксама ў арганізацыі масавых беспарадкаў у Джалал-Абадзе ў красавіку 2010 года. Ён апраўданы па артыкулах «Ужыванне гвалту ў дачыненні да прадстаўніка ўлады» і «Самавольнае прысваенне звання ці ўлады службовай асобы» КК КР.

Абдразак Барамбаеў адзначыў, што ў судзе Пайзулабек Рахманаў віну не прызнаў.

Улічваючы, што ён раней не судзімы, а таксама сума шкоды ўжо адноўленая, Рахманаву прызначанае пакаранне ў выглядзе 12 гадоў пазбаўлення волі ў калоніі ўзмоцненага рэжыму, а таксама штраф у 12 тысяч сомаў на карысць Джалал-Абадскай аблдзяржадміністрацыі і ў 25 тысяч на карысць УУС.

Па дадзеных следства, Пайзулабек Рахманаў, займаючы пасаду дырэктара дзяржагенцтва па дзяржаўных закупках і матэрыяльных рэзервах, запрошаны для ўдзелу ў святкаванні 80-годдзя абвяшчэння Наакацкага раёна, дзе праводзіўся марафон пад назвай «Ноокатым менин ооматым». Нягледзячы на тое што Рахманаў запрошаны ў якасці прыватнай асобы, ён, выкарыстоўваючы службовае становішча, даў пісьмовае ўказанне дырэктару Фонду дзяржаўных матэрыяльных рэзерваў пералічыць на рахунак марафону 200 тысяч сомаў.

Дзяржабвінавачанне прасіла 15 гадоў турмы, а абарона абвінавачанага - апраўдаць падсуднага.

Пайзулабек Рахманаў быў абвешчаны ў міжнародны вышук у траўні 2010 года ў сувязі з падазрэннем ў здзяйсненні шэрагу службовых злачынстваў. 15 чэрвеня 2012-га ён затрыманы ў Жамбылскай вобласці Казахстана. Пры затрыманні ён прад'явіў пашпарт грамадзяніна Рэспублікі Беларусь на імя <>bПазыла Ташбаевіча Ташбаева. Аказалася, што пашпарт змоўшчыку Бакіева выдаў Першамайскі РУУС Менска.

Набліжанага Курманбека Бакіева даставілі ў следчы ізалятар ГКНБ КР. Пры экс-прэзідэнце ён займаў высокія пасады. У траўні 2010-га паспрабаваў захапіць уладу ў Джалал-Абадскай вобласці, уварваўшыся ў будынак абласной адміністрацыі і абвясціўшы сябе губернатарам рэгіёну. Затым уцёк.

Нагадаем, былы кіраўнік Кыргызстана Курманбек Бакіеў і яго брат Жаныбек Бакіеў абвешчаныя ў міждзяржаўны вышук на тэрыторыі СНД і ў міжнародны вышук па лініі Інтэрпола. Кыргызскі кіраўнік з сям'ёй хаваецца ў Беларусі з красавіка 2010 года. Яшчэ ў жніўні 2010 года Курманбеку Бакіеву быў выдадзены пашпарт грамадзяніна Беларусі, а ў мінулым годзе ён набыў дом за 2 млн даляраў на ўскраіне Менска. Просьбы аб выдачы братоў Бакіевых беларускія ўлады неаднаразова ігнаравалі. У лютым 2013 года Курманбека Бакіева завочна прысудзілі да 24 гадоў турмы за злачынствы, звязаныя са злоўжываннем службовым становішчам.