Чарговы «шпіёнскі раман» ад КДБ

Не выключана, што арыштам ксяндза Лазара спецслужбы спрабуюць адыграцца за правал у справе Гайдукова.

Так кіраўнік прававой дапамогі насельніцтву, былы следчы пракуратуры Алег Воўчак пракаментаваў сайту charter97.org абвінавачванне ксяндза Уладзіслава Лазара ў здрадзе дзяржаве.

«Асабіста я перакананы, што ён не мог шпіёніць. Я ведаю, што гэта ксёндз ад Бога. Ён шмат дапамагаў людзям і не мог супрацоўнічаць з нейкімі незразумелымі «агентамі». Заўважце, нам зноў усё падаюць адрывіста. Пасля арышту прайшло ўжо тры месяцы, але не было ні адной нармальнай прэс -канферэнцыі, дзе б усе патлумачылі больш ці менш дэталёва», - адзначыў праваабаронца.

Ён падкрэсліў, што такім чынам ідзе падкідванне напалову праўдзівай інфармацыі, разлічанай на сярэдняга абывацеля.

«Справа ў тым, што з Камітэта дзяржбяспекі сышло шмат прафесійных супрацоўнікаў, таму што працаваць проста немагчыма. Спецслужбы павінны займацца бяспекай краіны і сапраўды сур'ёзнымі рэчамі, а не палітычнымі вышукам. Падобныя справы паказваюць узровень прафесіяналізму супрацоўнікаў КДБ», - дадаў Алег Волчак.

Юрыст мяркуе, што арышт ксяндза Лазара - гэта працяг «шпіёнскіх раманаў», якія «піша» КДБ.

«Бо справу Андрэя Гайдукова таксама вельмі актыўна раскручвалі, і ўсіх пераконвалі, што будзе сенсацыя. Але ў выніку атрымаўся пшык. У Беларусі няма прафесійных агентаў накшталт Джэмса Бонда, якія б валодалі мовамі, зброяй і псіхалагічнымі прыёмамі на падобным узроўні. Супрацоўнікі спецслужбаў - гэта ў асноўным маладняк. Я памятаю, калі ў нашым офісе і ў маёй кватэры ў 2010 годзе праводзілі ператрусы. Прыходзілі маладыя людзі, якім я раіў чытаць кнігі, як іх правільна праводзіць», - распавёў на заканчэнне былы следчы пракуратуры.

Нагадаем, 26 ліпеня Лукашэнка заявіў аб затрыманні супрацоўніка беларускіх спецслужбаў, які працаваў на замежныя дзяржавы праз прадстаўнікоў каталіцкай царквы. Супрацоўнік спецслужбаў, удакладніў ён, «не толькі здаваў інфармацыю, але праз яго дзейнасць пацярпелі людзі, якія працуюць за мяжой». Праз некаторы час стала вядома аб затрыманні ксяндза Уладзіслава Лазара. Ён абвінавачваецца ў перадачы грошай «шпіёну».