22 кастрычнiка 2019, aўторак, 18:10
Мы ў адной лодцы
Рубрыкі

Барыс Нямцоў: Пуцін вядзе Расею да немінучага распаду і дэградацыі

13
Барыс Нямцоў: Пуцін вядзе Расею да немінучага распаду і дэградацыі

Адзін з лідараў расейскай апазіцыі назваў палітыку, якую праводзіць Уладзімір Пуцін, «вар'яцкай».

Калі б прэзідэнт быў сапраўды заклапочаны лёсам расейцаў ва Украіне, то яму спачатку варта было б кардынальна палепшыць жыццё ўласнага народа, мяркуе сустаршыня Рэспубліканскай партыі Расеі - Партыі народнай свабоды (РПР-Парнас) і лідар руху «Салідарнасць» Барыс Нямцоў. Пра гэта ён заявіў у эксклюзіўным інтэрв'ю расейскай службе «Галасы Амерыкі».

- Барыс Яфімавіч, якімі мэтамі кіруецца прэзідэнт Уладзімір Пуцін, вызначаючы палітыку Расеі ў дачыненні да Украіны?

- Для Пуціна заўсёды галоўнае - любым коштам утрымаць уладу. Гэтым ён кіруецца і ў сваіх дзеяннях ва Украіне. Відавочна, што ўсе размовы аб клопаце пра расейцаў - па-першае, хлуслівыя, паколькі расейцаў ніхто не ўціскае ні ў Крыме, ні на ўсходзе Украіны. Калі б ён сапраўды клапаціўся пра расейцаў, то яму лепш заняцца праблемай падаўжэння жыцця расейскага народа ў Расеі. А то ў нас працягласць жыцця, як у Афрыцы.

Калі б ён сапраўды клапаціўся пра расейцаў, то ён бы думаў пра тое, як падтрымліваць і развіваць у краіне адукацыю, навуку, культуру і таму падобнае. А ён нахабным чынам эксплуатуе гэтакую настальгію па «саўку», Савецкаму Саюзу, і мяркуе, што агрэсія супраць Украіны як раз кансалідуе вакол яго па-імперску настроеных, абражаных гісторыяй грамадзян, якія адчуваюць сябе прайграўшымі ў «халоднай вайне».

- Наколькі ён паспяховы ў гэтым?

- У прынцыпе, Пуцін, дзейнічаючы тактычна, дасягнуў пэўных поспехаў. Яго рэйтынг на працягу апошніх шасці гадоў няўхільна падаў. Усе разумелі, што гэта ўлада злодзеяў і махляроў. Яго сябрукі казачна ўзбагаціліся. Усе ведаюць, што краіна наскрозь карумпаваная. Цяпер ён адцягнуў увагу грамадства ад рэальных праблем, і яго рэйтынг узрос да нябёсаў, перавысіў 80 адсоткаў. Тактычна ён пераможца. А стратэгічна ён прайграў усё. У першую чаргу ён аддаў Расею ў лапы Кітая.

Паколькі расейская эканоміка цалкам залежыць ад экспарту нафты і газу, а Еўропа будзе гарантавана рабіць усё, каб пазбавіцца ад залежнасці ад Газпрому і нафтавых кампаній Расеі, цалкам відавочна, што адзіны рынак збыту цяпер для Пуціна - Кітай. Але кітайцы дарагім коштам купляць расейскія вуглевадароды не будуць.

Паколькі альтэрнатывы Пекіну больш няма, кітайцы даб'юцца радыкальнага зніжэння коштаў на нафту і газ, і Крэмль будзе вымушаны прадаваць іх па дэмпінгавых коштах, тым самым паставіўшы расейскую эканоміку ва ўмовы страшэннага дэфіцыту і крызісу.

- Да якіх наступстваў можа прывесці такая палітыка?

- Уласна, тое, што зараз адбываецца, - адток капіталу, рэзкае скарачэнне інвестыцый, інфляцыя, дэвальвацыя - гэта толькі першыя трывожныя званкі на яго вар'яцкую імперыялістычную палітыку, якую ён праводзіць у дачыненні да суседзяў. Акрамя таго, ён будзе вымушаны марнаваць велізарныя грошы на гонку ўзбраенняў.

Бо відавочна, што вакол Расеі цяпер адны ворагі. Нават мірныя кітайцы зараз прэтэндуюць на Далёкі Усход. Ён фактычна пазбавіў Расею апошніх саюзнікаў. Нават Беларусь, Казахстан, Азербайджан вельмі насцярожана зараз ставяцца да пуцінскай Расеі.

У прынцыпе гэтая палітыка нясе ў сабе распад краіны. Калі ўпадуць цэны на нафту, а яны, вядома ж, упадуць, высветліцца, што ўтрымліваць дзяржаву немагчыма.

Што ўгода, якая, дапусцім, ёсць у Пуціна з каўказскімі карумпаванымі кланамі, абрынецца. Бо ўгода гэтая грунтуецца на формуле: я вам - крэўныя грошы, а вы мне - лаяльнасць. І тое, што ён зараз падтрымлівае сепаратыстаў ва Украіне, вельмі цяжка адгукнецца для Расеі, бо ў яе поўна сваіх сепаратыстаў: і на Каўказе, і ў Татарстане, і нават у Сібіры.

Я не выключаю, што сепаратысты могуць з'явіцца ў тым жа Калінінградзе. Словам, ён праводзіць абсалютна паранаідальную, вар'яцкую палітыку, якая вядзе краіну да немінучым забыццю, распаду і дэградацыі. Пагадзіцца з гэтым мы, вядома, ніколі не зможам.

- Чаму Масква настойліва праводзіць ідэю федэралізацыі Украіны?

- Мэта зразумелая - расчляненне Украіны, далучэнне ўсходніх украінскіх зямель да Расеі. Гэта значыць - паўтор таго, што было з Крымам.

Усё гэта словаблудства наконт федэралізацыі, па-першае, ілжывае, а па-другое, цынічнае. Справа ў тым, што сам Пуцін дашчэнту знішчыў федэралізм і мясцовае самакіраванне ў Расеі. Як дэпутат Яраслаўскай абласной думы, я бачу гэта на свае вочы. У Яраслаўлі не хапае грошай на лекі, на хворых, якія паміраюць праз адсутнасць лекаў. Не будуюцца дарогі, руйнуюцца дамы, растуць цэны на камунальныя паслугі.

Усім, асабліва ў цэнтры, на гэта напляваць. Вось гэта - як раз следства знішчэння федэратыўных стасункаў. Таму калі ты ў сябе ў краіне знішчаеш федэралізм, але навязваеш яго суседу, то паверыць у шчырасць тваіх намераў нельга. А паверыць у жаданне адкроіць кавалак суверэннай дзяржавы можна.

І, дарэчы, сённяшні выступ грамадзяніна Пуціна лішні раз гэта пацвердзіў. Ён, па сутнасці, сказаў, што ўсходнія вобласці Украіны з'яўляюцца новай Расеяй. Гэта значыць тым самым адкрыў зялёнае святло для захопу гэтых тэрыторый і далучэння іх да Расеі.