Расея разгарнула ў Сірыі найноўшыя ракетныя комплексы С-400
8- 13.11.2015, 14:16
- 23,985
Расея разгарнула перадавыя зенітныя ракетныя сістэмы СПА С-400 на авіябазе Хмеймім на сірыйскім ўзбярэжжы ў правінцыі Латакія.
Пра гэта паведамляе брытанскае выданне Daily Mail, піша "Еўрапейская праўда".
Звышсучасныя ракетныя сістэмы С-400 (паводле класіфікацыі NATO SA-21 "Growler") маюць максімальную далёкасць паразы 400 км і здольныя збіваць самалёт на вышыні да 27 км - што больш чым удвая перавышае крэйсерскую вышыню пасажырскага авіялайнера.
Расейскае міністэрства абароны запрасіла групу з 50 замежных журналістаў на авіябазу ў Латакіі, на тэрыторыі якой удалося ўбачыць радыёлакацыйныя сістэмы.
Ракетная сістэма складаецца з трох асноўных частак: цэнтральнага кантрольнага пункта, радыёлакацыйнага комплексу, здольнага адсочваць да 300 мэтаў, і зенітна-ракетных пускавых установак.
Далёкасць паражэння зенітна-ракетнай сістэмы пакрывае плошчу, якая ахоплівае большую частку Сірыі, Паўднёвую Турцыю, Кіпр, усходняе Міжземнамор'е, а таксама частку Ізраіля.
Экспэрты адзначаюць, што разгарнуўшы С-400 у Латакіі, Расея пасылае выразны сігнал Турцыі ды Ізраілю, а таксама стварае шчыт над прыбярэжнымі раёнамі Сірыі.
Таксама не выключаная чарговая "выпадковая" ўцечка інфармацыі аб расейскім узбраенні, як гэта было са звышсакрэтнай сістэмай "Статус-6".
С-400 здольны перахапляць крылатыя ракеты і іншыя патэнцыйныя паветраныя пагрозы. Ён таксама ўважаецца за сур'ёзную пагрозу для вайсковых самалётаў, такіх як брытанскія знішчальнікі "Тарнада" і F-15 і F-16 ВПС ЗША.