Фота рыбалкі ў лужыне пад Ваўкавыскам - сярод лепшых здымкаў аб экалогіі
10- 11.07.2015, 10:56
- 35,860
Фотаздымак незвычайнай рыбалкі ў замерзлай лужыне блізу Ваўкавыска трапіў у дваццатку лепшых з больш чым тысячы работ на тэму экалогіі.
Конкурс сярод беларускіх фатографаў пад назвай «Мой кадр у абарону прыроды» праводзіць амбасада Францыі.
Кадр пад назвай «Зімовая рыбалка вясной» зрабіў гарадзенец Барыс Мешчаракоў два гады таму, калі працаваў аператарам тэлебачання. Вяртаўся з камандзіроўкі ды ў адной з вёсак ягоную ўвагу прыцягнула дзіўная карціна, піша «Вечерний Гродно».
«Пейзаж кіношны: вясковыя мужыкі сядзяць з вудамі ў замёрзлым вадаёме, які па памеры больш нагадвае лужыну. Побач невялікі зграйкай дзелавіта расхаджваюць гусі. Сутнасць фатаграфіі - пагаршэнне экалагічнай сітуацыі прыводзіць да таго, што вяскоўцам даводзіцца рыбачыць нават у лужыне», - тлумачыць канцэпцыю сваёй працы Барыс Мешчаракоў.
Фотаздымак абраны з 1500 дасланых на конкурс. Працы адбірала французскае журы на чале з фатографамі і журналістамі. У дваццатку лепшых патрапілі здымкі яшчэ дваіх гарадзенцаў - Вікторыі Бохан і Сяргея Марозава. 14 ліпеня, у Дзень узяцця Бастыліі, нацыянальнага свята Францыі, з паўфіналістаў абвесцяць траіх пераможцаў.