Лукашэнка: Даўно прыйшоў час падвышаць пенсійны ўзрост

Пакуль у Беларусі не разглядаюць пытанне падвышэння пенсійнага ўзросту.

Пра гэта паведаміў сёння Аляксандр Лукашэнка падчас сустрэчы з працоўным калектывам ААТ «Баранавіцкае вытворчае баваўнянае аб'яднанне», піша БелТА.

«Мы ўвогуле да гэтага пытання не падыходзілі. Я вам шчыра сказаў, што нам пенсійны ўзрост даўно трэба было павялічыць», - сказаў дыктатар.

Лукашэнка адзначыў, што ў Беларусі невысокія пенсіі, таму што на аднаго пенсіянера даводзіцца занадта мала працуючых грамадзян.

«Гэта значыць, мы абцяжарваем сваіх дзяцей, - сказаў ён. - Калі вы хочаце, каб у краіне было столькі пенсіянераў на столькі працуючых - дзеля Бога, але пенсія будзе меншая. Таму мы пенсійнае пытанне не чапаем. Маё меркаванне вы ведаеце. Але вы гэтага не хочаце».