18 чэрвеня 2019, aўторак, 13:11
Мы ў адной лодцы
Рубрыкі

Мядзведзеў: Аб расейскай авіябазе ў Беларусі дамовіліся яшчэ ў 2009 годзе

16
Дзмітрый Мядзведзеў
ФОТА: РІА «НОВОСТИ»

Пагадненне якое рыхтуецца аб размяшчэнні на тэрыторыі Беларусі расейскай авіябазы з'яўляецца рэалізацыяй двухбаковых дамоўленасцей, дасягнутых у 2009 годзе.

Пра гэта заявіў прэм'ер-міністр Расеі Дзмітрый Мядзведзеў 8 верасня ў Горадні на прэс-канферэнцыі паводле вынікаў пасяджэння Еўразійскайга міжурадавага савета, паведамляе БелаПАН.

«Я нагадаю гісторыю гэтых дакументаў. Яна пачалася ў 2009 годзе, я маю да яе непасрэднае дачыненне. Тады былі падрыхтаваныя і падпісаныя пастановы, якія датычацца сумеснай аховы мяжы Расеі і Беларусі і сумеснай сістэмы супрацьпаветранай абароны. Уласна, пагадненне, пра якое вы кажаце, з'яўляецца рэалізацыяй гэтых пагадненняў. Нічога ў іх асаблівага няма», - цытуе Мядзведзева прэс-служба ўрада РФ.

На пытанне аб тэрмінах падрыхтоўкі і падпісання пагаднення расейскі прэм'ер адказаў: «Мы зыходзім з таго, што гэта павінна быць камфортна для беларускага боку, для нашага боку. Мы проста, што называецца, прапусцілі адпаведны дакумент праз урад Расейскай Федэрацыі паводле той працэдуры, якая існуе, і падалі яго прэзідэнту».

Са слоў Мядзведзева, такія авіябазы Узброеных сіл РФ дыслакуюцца ў Кыргызстане і Арменіі. «І нічога ў гэтым дзіўнага няма. Мы, уласна, гатовыя гэта рабіць з тымі краінамі, з якімі нас звязваюць саюзніцкія стасункі», - сказаў ён.

Пагадненне паміж Расеяй і Беларуссю аб размяшчэнні на беларускай тэрыторыі расейскай авіябазы ў адпаведнасці з пастановай урада Расеі ад 7 верасня №945 пададзенае на подпіс прэзідэнту Уладзіміру Пуціну.