Кіраўнік МЗС Польшчы: «Усходняе партнёрства» скончылася катастрофай
9- 30.01.2016, 10:38
- 11,734
Паводле слоў кіраўніка польскага МЗС, праграма пацярпела фіяска, паколькі не давала Беларусі ды іншым краінам перспектывы сяброўства ў ЕЗ.
Пра гэта паведамляе Polskie radio.
«Перакананне, што добрую ўсходнюю палітыку можна весці праз ЕЗ, з'яўляецца міфам», - заявіў міністр замежных спраў Польшчы Вітольд Вашчыкоўскі, адказваючы на пытанні і каментары дэпутатаў апазіцыі, якія пачаліся за ягоным экспазе ў Сейме.
На думку Вашчыкоўскага, «Усходняе партнёрства» не заслугоўвае высокую ацэнку, паколькі праграма не давала магчымасці краінам, якія былі ўключаныя ў яе - Украіне, Беларусі, Малдове, Арменіі, Грузіі ды Азербайджану, - шанец на ўступленне ў Еўразвяз. Праграма, на думку палітыка, адводзіла згаданым дзяржавам толькі ролю буфернай зоны паміж Расеяй і ЕЗ.
«Мы адкінулі гэтую канцэпцыю як няправільную. Усходняе партнёрства стварала для гэтых краін ілюзію, але не стварала перспектывы сяброўства ў Еўразвязе», - заявіў ён.