Абраны прэзідэнт Гамбіі правядзе сваю інаўгурацыю ў суседняй краіне

Інаўгурацыя Адама Бароу адбудзецца ў Сенегале.

Адама Бароу, які перамог на выбарах прэзідэнта Гамбіі, запрасіў ахвотных на сваю інаўгурацыю ў пасольства краіны ў Дакары, сталіцы суседняга Сенегала. Папярэдні прэзідэнт Гамбіі Яя Джамэ адмаўляецца пакідаць уладу і ўвёў у краіне рэжым надзвычайнага становішча, піша «Цяперашні час».

«Вы ўсе запрошаныя на маю інаўгурацыю сёння а 4 гадзіне дня ў амбасаду Гамбіі ў Дакары», — напісаў Бароу ў сваім афіцыйным Twitter.

У Facebook палітыка размешчаная спасылка на адпаведнае мерапрыемства, на момант публікацыі навіны пра сваё жаданне прыйсці абвясцілі 135 чалавек.

Дыпламатычныя прадстаўніцтвы дзяржаў карыстаюцца прывілеяй экстэрытарыяльнасці, такім чынам інаўгурацыя фармальна адбудзецца на тэрыторыі Гамбіі.

Адама Бароу, які перамог на выбарах прэзідэнта, хаваецца ў суседнім Сенегале. Ягоная інаўгурацыя была запланаваная на 19 студзеня. Парламент Гамбіі сваёй пастановай падоўжыў тэрмін паўнамоцтваў Джамэ яшчэ на тры месяцы.

Напярэдадні войскі краін, якія ўваходзяць у рэгіянальны саюз ЭКОВАС, размясціліся ўздоўж мяжы Гамбіі і прыстрашылі ўварваннем, калі дзейны прэзідэнт краіны Яя Джамэ не пакіне ўладу ці не будзе знойдзена іншага палітычнага выйсця. Сёння Сенегал увёў войскі ў Гамбію для звяржэння дыктатара.

Гамбія мае наземную мяжу толькі з Сенегалам. У 80-х дзве краіны аб'ядноўваліся ў «мяккую канфэдэрацыю» Сенегамбія, але саюз разваліўся праз нежаданне Гамбіі пераходзіць да больш цеснай кааперацыі.

Лідар Гамбіі ў снежні 2016 года раптоўна саступіў на выбарах кандыдату ад апазіцыі. Спачатку ён прызнаў паразу, але праз два тыдні заявіў, што адмаўляецца пакінуць пасаду праз фальсіфікацыі на выбарах.

Яя Джамэ ўзначальвае Гамбію з 1994 года. Ён прыйшоў да ўлады ва ўзросце 29 гадоў у выніку бяскроўнага перавароту. Ваенная хунта пад кіраўніцтвам Джамэ скасавала канстытуцыю і ўвяла каменданцкую гадзіну. Два гады арганізатары перавароту кіравалі краінай без усялякіх абмежаванняў. Толькі пад ціскам міжнароднай грамадскасці Джамэ правёў выбары і рэферэндум аб новай канстытуцыі. У 1996 годзе ён афіцыйна стаў прэзідэнтам. У 2001 і 2006 гадах Джамэ таксама перамог на выбарах.

Пасля аб'явы Джамэ аб тым, што ён не пакіне ўладу, узброеныя сілы Эканамічнай супольнасці заходне-афрыканскіх дзяржаў былі прыведзеныя ў баявую гатоўнасць. Дзейны прэзідэнт Гамбіі назваў гэтую пастанову «абвяшчэннем вайны».

У мінулыя выхадныя служба дзяржаўнай бяспекі Гамбіі закрыла тры прыватныя радыёстанцыі, размешчаныя непадалёк ад сталіцы дзяржавы Банджуле.

Яя Джамэ праславіўся дзякуючы эксцэнтрычным заявам. Напрыклад, у 2007 годзе ён заявіў, што адкрыў лекі ад СНІДу: пацыенту дастаткова тры дні ўціраць спецыяльную мазь, прыгатаваную з траў. Поўны склад лекаў невядомы, прэзідэнт сказаў, што ў яго ўваходзяць лісце банана і арахіса. Прадстаўнікоў міжнародных арганізацый, якія асуджалі методыку лячэння, улады Гамбіі выслалі з краіны.

У 2009 годзе Джамэ наважыў выгнаць з краіны ўсіх геяў, паабяцаўшы, што ўрад прыме законы «больш строгія, чым у Іране», а ўсім гомасэксуалістам і лесбіянкам «адрэжуць галовы».