Замежныя кампаніі сарвалі план выплаты падаткаў у казну

Многія з тых, каго ўлады заваблівалі ў якасці інвестараў, выявіліся няздольнымі плаціць падаткі ў бюджэт.

Міністэрства падаткаў і збораў абнародавала пералік кампаній, якія з мінулага года завінаваціліся беларускаму бюджэту.

Як вывучыў «чорныя спісы» «Штодзённік», у іх выявілася нямала кампаній з замежнымі інвестыцыямі.

Адно з самых вядомых - гэта нямецкае гандлёвае і сельскагаспадарчае таварыства «Штотц Агра-Сэрвіс», якое працуе ў Смалявіцкім раёне. Кампанія «прапісалася» ў «чорным спісе» Менскай вобласці, хоць зусім нядаўна была прыкладам, як выгадна замежнікам інвеставаць у беларускі АПК.

Таксама нямецкія карані мае забудоўшчык «РМ Інвестмент». Гэта дэвелаперская структура, якую стварыла сямейства Малераў, для будаўніцтва шматфункцыянальнага цэнтра на праспекце Дзяржынскага. Будоўля, размешчаная ля гатэля Renaissance, прыпыненая больш чым два гады таму.

Кампанія «Белтэрмінал ТЛЦ», якая праходзіць па «берасцейскаму спісу», цяпер часткова належыць польскім чыгункам PKP Cargo, якія выкупілі яе ў чэшскай групы Advanced World Transit. Чэхі інвеставалі ў гэты праект у канцы 2000-х гадоў, маючы намер стварыць буйны транспартна-лагістычны цэнтр на базе былога савецкага вайсковага пункта перавозкі грузаў з шырокай каляіны на стэфенсонаўскую.

У «заўсёднікаў» «чорных спісаў» ператварыліся італійская кампанія «БелАгракультура» і балгарская «Налібокі-Нёман», пра якія «Штодзённік» ужо пісаў.

Таксама ў ліку завінавачаных бюджэту ў новы год уступілі турэцкія кампаніі «Мінселка» і «Даніш-Бетон». Першая з'яўляецца ўладальніцай забаўляльнага комплексу «Журавінка», другая вырабляла ў Лагойскім раёне будаўнічыя матэрыялы.