У Латвіі спецслужба будзе сачыць за паездкамі чыноўнікаў у Беларусь
- 22.01.2017, 18:04
- 16,733
Паліцыя бяспекі Латвіі запатрабавала ў рыжскай Думе інфармацыю аб выправах службовых асоб у Беларусь ды іншыя краіны.
Пра гэта паведамляе «Радыё Свабода».
Такога кшталту інфармацыя патрэбная для контрвыведкі і забеспячэння рэжыму выканання дзяржаўных таямніц у муніцыпальных установах, растлумачылі ва ўстанове.
5 студзеня выканаўчы дырэктар Рыгі Юрыс Радзевіч на запыце Паліцыі бяспекі аддаў загад работнікам самакіравання і дэпутатам сталічнай думы падрыхтаваць інфармацыю аб запланаваных у 2016 годзе выправах у Беларусь, Расею ды іншыя краіны СНД і Кітай, а таксама сабраць звесткі аб афіцыйных і неафіцыйных паездках у гэтыя рэгіёны, якія ўжо былі.
Паводле звестак агенцтва BNS, такі запыт рыжская Дума атрымала ўпершыню.