Аляксандра Герасіменя: Пастараюся наведаць усе вобласці краіны

Вядомая беларуская спартоўка правядзе бясплатныя майстар-класы ў плаванні.

Плыўчыха Аляксандра Герасіменя праз «Фэйсбук» прапануе правесці майстар-класы ў школах, спартыўных класах і вучэльнях. Спартоўка згодная нават правесці сустрэчу з працоўнымі калектывамі, калі ёсць такое жаданне. Прычым бясплатна, паведамляе «Еўрарадыё».

Аляксандра трохі губляецца, калі журналіст задае ёй простае пытанне: калi правядзенне такiх майстар-класаў - не патрабаванне Мінспорту, і калі яны бясплатныя, навошта ёй гэта трэба? Таму што вядома, што часу ў яе не стае.

- Добрае пытанне, вядома ... Я нават не ведаю, як адказаць! Мне самой цікава сустракацца з людзьмі, атрымліваць ад іх пазітыўную энэргію. Часам вельмі карысныя сустрэчы бываюць не толькі для іх, але і для мяне. Гэта такое элементарнае падштурхоўванне да дзеяння: калі пасля такой сустрэчы хаця б адное дзіця пойдзе займацца спортам ці знойдзе сябе ў нейкай іншай галіне дзейнасці - для мяне гэта ўжо вялікі плюс!

Са слоў Герасімені, шмат заявак на майстар-класы ў яе было яшчэ напярэдадні Алімпійскіх гульняў. Але тады яна была цалкам засяроджаная на падрыхтоўцы.

"А цяпер такая магчымасць з'явілася, і я надумала даехаць да тых, хто мяне так доўга чакаў", - кажа Аляксандра.

Прычым неабавязкова, каб у школе, куды едзе спартоўка, быў басейн: майстар-клас можа быць праведзены і ў іншай, не "воднай", форме. "Сустрэча тады праходзіць у выглядзе гутаркі: я распавядаю свае цікавыя гісторыі, пра цяжкасці, з якімі сутыкалася, аб плаванні, адказваю на пытанні. Людзям цікава ведаць не толькі як я трэніруюся або плаваю, але і як, да прыкладу, спартоўцы такога ўзроўню спраўляюцца з нейкімі бытавымі цяжкасцямі, гэта так шчыра і цікава", - тлумачыць спартоўка.

Аляксандра і раней праводзіла майстар-класы ў школах і працоўных калектывах. Вось толькі гэта былі "адзінкавыя" мерапрыемствы, а гэтым разам яна хоча зладзіць сапраўдны майстар-тур па Беларусі.

"Гэта будзе даволі працяглая акцыя, у мяне будзе магчымасць наведаць практычна ўсе вобласці краіны. Пастараюся захапіць як мага больш рэгіёнаў", - абяцае спартоўка.