У Беларусі стогадовы рубеж пераадолелі 346 жанчын і 40 мужчын

Сярод рэгіёнаў краіны па колькасці доўгажыхароў лідзіруе Гарадзенская вобласць.

Стогадовы рубеж пераадолелі 386 жыхароў Беларусі, паведамілі БелТА ў Міністэрстве працы і сацыяльнай абароны.

Як сведчыць статыстыка, колькасць доўгажыхароў у краіне стала змяншацца (на 1 студзеня гэтага года іх было 415).

Са слоў спецыялістаў, традыцыйна сярод айчынных доўгажыхароў жанчын значна больш, чым мужчын - у 9,6 раза: так, сваё 100-годдзе адсвяткавалі 346 жанчын і 40 мужчын.

У міністэрстве праінфармавалі, што на 1 кастрычніка гэтага года чатыры беларусы знаходзіліся ў шаноўнай узроставай катэгорыі 110-114 гадоў.

Гарадзенская вобласць лідзіруе сярод рэгіёнаў краіны па колькасці доўгажыхароў: тут на 1 кастрычніка гэтага года налічвалася 74 чалавекі старэйшыя за 100 гадоў.

На другую пазіцыю геранталагічнага рэйтынгу паднялася Віцебская вобласць (66).

Трэцяе месца - у Гомельскай вобласці (61).

У горадзе Менску пражываюць 52 чалавекі, якія ўжо адзначылі свой векавы юбілей.

У Магілёўскай вобласці - 46.

У Берасцейскай вобласці - 45.

У Менскай вобласці налічваецца 42 жыхары ва ўзросце старэй за 100 гадоў.