З'явіліся падрабязнасці трагедыі ў Беразіне, дзе памерлі парадзіха і двойня

Пра цяжарнасць Алы Мікульскай не ведаў нават муж.

У Беразіно Менскай вобласці вечарам 28 верасня пасля родаў ва ўласнай кватэры памерла 29-гадовая Ала Мікульская. Нованароджаныя дочкі-блізняты крыху пазней былі выяўленыя ў ваннай без прыкмет жыцця. Дзяўчынкі нарадзіліся даношанныя і, як ужо высветлілася, жывыя. СК распачаў крымінальную справу, піша tut.by.

Алу выявіла яе сястра, калі зайшла ў госці, і неадкладна выклікала хуткую дапамогу, піша «СБ. Беларусь сегодня». Медыкі прыехалі за хвіліны - цэнтральная раённая лякарня даслоўна за тры сотні метраў ад гэтага пяціпавярховіка. Але шпіталізаваць жанчыну давялося прымусова: нават будучы ў вельмі цяжкім стане, яна адмаўлялася. У аддзяленне рэанімацыі яе даставілі ўжо ў коме. Пасля абследавання стала зразумела, што жанчына нядаўна нарадзіла. Тут жа дадому да Мікульскай выехала новая хуткая і міліцыя. Лекары тым часам рабілі ўсё магчымае, але праз 49 хвілін Ала памерла. Колькі яна знаходзілася без прытомнасці, колькі страціла крыві, застаецца толькі меркаваць.

Са слоў Аліны Жызнеўскай, галоўнай лекаркі Бярэзінскай цэнтральнай раённай лякарні, Ала Мікульская не стаяла на ўліку аб цяжарнасці і да лекараў не звярталася:

- Уся патрэбная дапамога, якая надавалася дома і ў стацыянары рэанімацыйнага аддзялення, была зробленая напоўніцу. Для гэтага мелася ўсё неабходнае. На жаль, праз позні зварот смяротны зыход прадухіліць не ўдалося.

Ні суседзі, ні сябры сям'і, ні супрацоўнікі цэнтра карэкцыйна-развівальнага навучання і рэабілітацыі Бярэзінскага раёна, дзе жанчына з'яўлялася з хворым ДЦП сынам даслоўна кожны дзень, аб цяжарнасці не здагадваліся. Не ведаў пра яе, як ужо вядома, нават муж Віталь і бацькі Алы.

- Апошнім разам Ала з зяцем і ўнукам тыдні два таму сюды прыязджалі. Я нічога так і не западозрыла. Усё ў ёй здавалася мне па-ранейшаму: і вонкава быццам яна выглядала як звычайна, і паводзіны, і настрой - усё як заўсёды.

Хлопчык пакуль будзе жыць з бабуляй і дзядулем у вёсцы.

- Я так і сказала Віталіку: ты працуй, а я буду дзіця глядзець. Ён у Менску прыкладна рублёў 600-700 атрымлівае. І муж мой яшчэ таксама працуе. Выгадуем хлопчыка. І тых бы дзетак выкармілі! Навошта Алачка так зрабіла?..

Магчыма, на гэтае пытанне адкажа следства. Дэпутаты ж, дарэчы, ужо прапануюць заканадаўча забараніць хатнія роды.

Трагедыі з загубай парадзіхі і ейных двух дзяцей у Беразіне атрымалася б пазбегнуць, калі б загінулая стала на ўлік і назіралася ў медыкаў, раней заявіла начальніца Галоўнай управы арганізацыі медыцынскай дапамогі і экспэртызы Міністэрства аховы здароўя Беларусі Алена Богдан.

«Гэтая трагедыя - яшчэ адзін трагічны вынік адсутнасці пастаноўкі на ўлік, назірання падчас цяжарнасці і родаў дома. Наколькі пажаданая была цяжарнасць і нараджэнне дзяцей для гэтай сям'і - ацэняць следчыя органы. З наяўнай інфармацыі, жанчына, на жаль, (...) факт цяжарнасці хавала не толькі ад лекараў, але і ад сваякоў», - гаворыцца ў паведамленні Міністэрства аховы здароўя.

У мінулым годзе ў Беларусі было зафіксавана 230 хатніх родаў. З іх 5 скончыліся кепска - загінулі дзеці, выпадкаў загубы маці не было. Аднак варта ўлічваць, што да паняцця «хатнія роды» медыкі адносяць і заўчасныя роды (і іх большасць у гэтым выпадку), калі працэс з'яўлення на свет дзіцяці застае жанчыну недзе ў дарозе ці нават у аўтамабілі хуткай дапамогі. Нават у прыёмным пакоі радзільні - гэта таксама, лічыцца, роды дома.